Gibi Doran ku tres komposishon pa tres Dama den Festival di Tumba

184

WILLEMSTAD,—-Festival di Tumba 2019 ta bai bira hopi interesante, ‘E Mulina’, a haña informashon ku e legendario kompositor Gilbert “Gibi” Doran pa promé biaha ta bai tin tres komposishon pa tres Dama den Festival di Tumba.

Nunka promé Gibi Doran a komponé pa tres dama den mes un aña den festival di Tumba. Nos tin informashon ku e aña aki te na e momentu nan aki Gibi Doran tin kuater komposishon ku e ta bai kuné komo kompositor. E tres dama nan ku Gibi a komponé pe ta Ludsella “Tela” Sambo, Niata Augusta i Damisha “Reed” Gregorio.

Mester bisa ku “Tela Sambo” ta bai ku agrupashon musikal G-Spot, Niata Augusta ta bai ku agrupashon musikal ONE i Damisha “Reed” Gregorio ta bai ku ICONS BY GIO. Pues sigur e aña aki Gibi Doran lo ta bon representá ku su komposishon nan den Festival di Tumba.

Tambe ‘E Mulina’, tin informashon ku Juni Juliet tambe lo ta bèk despues di mas di trinta aña, t’asina ku Juni a partisipá na tres okashon i esaki nan ta na aña 1980 ku su mes un komposishon ku ta “Dòkter Karnaval, na aña 1985 ku su mes un komposishon ku ta “Swing bai bin” i na 1987 e ta partisipá pa último bes ku un komposishon di Ike Jesurun ku e komposishon “Mes un kaminda ku biaha pasa”. Pues despues di 32 aña Juni Juliet ta bèk i pa promé biaha ku un komposishon di Gibi Doran, di informashon ku nos ta disponé di dje ta bisa ku Juni Juliet ta bai partisipá ku agrupashon musikal GENTZ TRE’CHIC, pero nos no por a haña ni Juni Juliet tampoko ni Archel Calister pa konfirmá i informashon en kuestion.