Orkesta Vega ku su promé presentashon den temporada di Karnaval

190
Awe nan ta kuminsá aktivá pa ku temporada di Karnaval 2019.

WILLEMSTAD,—-E agrupashon musikal Orkesta Vega ta ranka sali awe pa loke ta trata nan temporada di Karnaval 2019, nan promé presentashon lo bai ta awe nochi na Sambil. Di informashon ku nos tin ta bosa ku hinter e wikènt aki e banda ariba menshoná tin presentashon den aktividat nan di Karnaval.

T’asina ku Orkesta tin presentashon awe nochi na Sambil, mañan riba Kleine Werf i djadumingu tambe nan tin un presentashon den ambiente di Karnaval. Pero esun di awe nochi ta en konekshon ku apertura ofisial di Karnaval 2019.

Pa loke ta trata awe nochi tin apertura di temporada di karnaval 2019. Esaki lo bai ta un Jump Up pa nos hóben nan. No ta un sekreto ku Fundashon J.A.G. ta keda kere ku nos hoben nan ta e relevo nan di nos Karnaval.

E Jump Up ta kuminsá pa 6’or di atardi en punto for di Samira Building riba F.D. Rooseveltweg i terminá na Sambil. Aki lo bai tin diskurso di nos Minister sra. Marilyn Alcala – Walle, Presidente di Fundashon J.A.G. sr. Hubert “Juni” Aniceta, Pastor Curtis tambe lo hiba palabra. Despues lo tin presentashon di nos Rei di Tumba Hubenil Gian van Eiker i nos Rei di Tumba grandi Urwin Jano, ku nan tumba nan ganadó di 2018.

Mester bisa ku na Sambil tin e parti musikl di Orkesta Vega, i na final lo bai tin un tremendo shou di vürwèrk presentá pa Gustavo Semeleer. Asina aki Fundashon J.A.G. ta hasi e apertura pa e dushi temporada di Karnaval 2019, e fiesta kultural mas grandi na Kòrsou.