Bario pa Bario den su 24 aña di lucha na Kòrsou

388
Otrobanda—Ayera, djaluna 7 di yanüari 2019 programa Bario pa Bario a kumpli su di 24 aniversario komo un plataforma ku kier a interkambiá di opinion riba e importansia di nos barionan.  Programa Bario pa Bario a ranka sali ku transmishonnan dirèkt den barionan ku habitante i organisashonnan di bario na palabra pa kompartí nan konosementu i eksperensia di nan bario.

 

Tambe e programa sa elaborá riba orígen di e barionan, anto para ketu na sierto tradishon i kustumbernan den bario, profeshonnan ku tabata keda ehersé manera di sneiru, karpinté, mètsla, plantashon i krio di bestia, piskadónan, trahamentu di pan, bolo i kos dushi, e papel di tiendanan di bentana. Famianan netamente di sierto barionan! Tambe programa Bario pa Bario sa profundisá den e sirkunstansia di gruponan ku e bin establesé na Kòrsou i e papel ku nan a hunga den e komunidat aki.Por ehèmpel, e asina yamá arabirnan (emigrantenan di mediooriente), okupando nan mes ku hasimentu di komersio ku suidadanonan di ménos rekurso, kendenan di tal forma a kontribuí ku subi kalidat di bida pa un grupo grandi den e komunidat aki.

Surinameñonan ku a bini Kòrsou pa traha na SHELL, den enseñansa i e sektor di kuido médiko (hospital).  E efektonan di binimentu di e refineria na Kòrsou, presensia di e negoshi di wama na Nieuwpoort etcetera. Hopi ta esnan ku direpente ta kere ku krímen ta kita kai for di shelu. Rumannan, Kòrsou a konosé e temporada di músika di bandanan guitara plat ku a surti e efekto di un ‘booming’ musikal den pueblo, bandanan musikal e tempu ei tabata pertenesé na bario.

‘High flying park’ ku a aportá ku un sierto grado artístiko, kombibensia i solidaridat. Futbòl un tempu tabata hopi mará na bario, e ekipo di Jong Colombia tabata di Boka Samí, Wacker di Boka Samí i Jandoret, SUBT tabata konsentrá riba barionan di Punda, e klup Skèrpènè ku e área di Skèrpènè, Centro Dominguitu ku e bario Dominguitu, Jong Holland di Otrobanda, Vesta tabata di Santa Maria, Veendam di P.L. Jansenstraat i Oranjestraat, UNDEBA tabata di Bándabou, Sithoc tambe di Otrobanda. Tur ta aspektonan ku tabata yuda fortifiká e identidat i sentido di bario, anto den realidat tur esaki mas bien tabata kontribuí na subi kalidat di nos futbòl. Kòrsou su futbòl e tempu ei debidamente tabata konta den su region.

Kambionan drástiko ku a suak e entidat bario tin hopi di haber ku gobernashon sin vishon, sin direkshon i sin propósito ku pa kuminsá nunka no a interpretá i òf balorá nifikashon di bario sufisientemente. Tuma por ehèmpel e desishon apsurdo pa saka trahadónan profeshonal for di bario, loke a habri porta hanchu pa deterioro sosial, pobresa, ilegalidat, mal uzo di droga, deskuido di e kòntròl sosial nesesario pa buena marcha di kualke bario, shushedat konsentrá den barionan ta na órden del dia, entre tantu tin kasonan di gèngnan kriminal ku ta laga nan bos resoná den barionan!

Programa Bario pa Bario ya na aña 1999 a kambia di estilo i a kuminsá enfoká riba e posibilidat di BARIO komo instrumento pa progreso i adelanto di nos isla, komo tal e programa a bira ta strès riba selebrashon di dianan di bario, pero lamentablemente e selebrashonnan aki den mayoria kaso a bin resultá den intentonan pa gana plaka ku benta di kuminda i bebida, anto sin un kontenido real pa subi stándartnan den barionan.

Medidanan duru di gobièrnu ku a desemboká den salida masal di yunan di Kòrsou rumbo pa Ulanda un banda i e otro banda entrada di gruponan grandi di strañero aki na Kòrsou, finalmente a kaba di mata e sentido poko sentido di bario ku a resta kasi por kompletu. Despues di e intento pa atraves di deklarashon di aña 2006 komo aña di bario, programa Bario pa Bario a bolbe adaptá su estilo dor di djòin ku UNSEBAKO pa yuda ‘boost’ aktividatnan di sentronan di bario.

Pero, BARIO semper lo keda e ángulo ku mester focus riba dje si nos ke krea un komunidat stabil, ku su suidadanonan komprometé ku esfuersonan pa buena marcha di hinter e isla aki. Kòrsou lo no progresá si gobernashon no ta dediká ni ta hasi esfuerso real pa nos barionan ta sano.