CURINDE ke mantené zona ekonómiko liber di produkto falsifiká

Trahando duru fo’i 2014

94
Nieuwe Haven– Zonanan Ekonómiko di Kòrsou, manehá i operá pa Curaçao Industrial and International Trade Development Company N.V (Curinde), for di 2014 a drenta un era kaminda ta hasi lo máksimo pa eliminá produktonan falsifiká den nos zonanan i ta trahando duru pa krea zonanan ekonómiko ku un reputashon di ta enforsá rèspèt pa propiedat intelektual.

E último aki no ta un meta riba su mes, pero ta pa kumplí ku loke tin stipulá den nos Kódigo Penal (e kambio den lei, ku no por komersialisá i transbordá artikulonan falisifiká atrabes di nos zonanan ekonómiko, a tuma luga for di den 2011) pero mas importante ainda pa atraé i ofresé espasio na empresanan ku ke desaroyá negoshi duradero for di Kòrsou. Curinde den esaki no ta partísipe den kasonan sivil entre  entidatnan ku ta den disputa ku otro den korte kaminda tabatin denunsia di komersio di produktonan falsifiká. Kòrsou, pa medio di Curinde, for di 2014 ta hasiendo esfuersonan máksimo pa  krea zonanan ekonómiko kaminda tin konsenshi i ta enforsá rèspèt pa propiedat intelektual. Danki na entre otro e akuerdo será ku International Anti-Counterfeiting Coalition (IACC), Kòrsou no únikamente a logra krea un base di konosementu pa por a transformá nos zonanan ekonómiko, pero tambe ta trahando duru pa krea un imagen mundialmente ku Kòrsou tin un zona ekonómiko interesante pa eksplorá komo destinashon pa establesé i hasi negoshi for di dje ku mundu. Huntu ku demas entidatnan lokal, inkluso komersiantenan establesé den nos zonanan mes, a hasi hopi esfuerso pa por logra loke te awor a keda lográ. Ta ku esfuerso di tur envolví so por konservá e posishon i imagen di Kòrsou su zonanan Ekonómiko den mundu pa loke ta trata komersialisashon di produktonan. P’esei Curinde kontinuamente ta sigui hasi su máksimo esfuerso pa konvensé gobièrnu ku ta importante pa invertí den mantenshon di un zona kaminda e rèspèt pa propiedat intelektual ta keda enforsá.

E esfuersonan ta forma parti di un maneho integral kaminda ta optimalisá e fasilidatnan afin ku e ta bira mas fásil i atraktivo pa operá for di nos zonanan ekonómiko. Ta bon menshoná ku banda di esaki, gobièrno a instalá un komishon kontra falsifikashon di marka den kual tin representashon di entre otro Curinde mes, Ministerio Públiko, Duana i MEO. Además, durante último añanan Curinde a invertí den halsa seguridat di nos zona, sera aliansa ku zonanan den region manera na Repúblika Dominikana i promoshon di e zona mes den merkadonan ku tradishonalmente tabata kumpra for di nos zonanan ekonómiko. Tur esaki lo ta aun mas efektivo si Curinde por tin e sosten di tur stakeholder pa nos por krea un ambiente di hasi negoshi na Kòrsou mas atraktivo i kompetitivo den mundu.