Delegashon Kòrsou via IPKO no tin kapasidat pa atendé Areglo di Disputa

276
Philipsburg—E siman aki, ta tuma lugá na St. Maarten, e konsulta parlamentario den Reino, IPKO. Manera menshoná, unu dje tópikonan ku tin mas di 8 aña ta kologando riba kabes di e konsulta “dekorativo” ta Areglo di Estado.

E problemátika di Areglo di Disputa ta unu eksistente for di 2006 pa 2007, na momento e paisnan den Reino a kuminsá nan preparashon pa 10-10-10. Durante e negosiashonnan, na Utrecht sèptèmber 2007, e arkitekto den Reino Ulandes, Hirsh Ballin a introdusí e konsepto di “Leinan di Konsenso”. Via di implementashon di e leinan aki, mester a regulá e kambionan pa 10-10-10. Un di e diskushonnan for di 2007, tabata pa introdusí un areglo di disputa, na momento e kambionan den Reino Ulandes okashoná konflikto. E paisnan chikitu no tabata kier a bai via di e Hunta di Minister di Reino mas, debí ku esaki tabata un institushon ulandes unilateral. Asina e negosiashonnan a yega te na 2010, sin nunka a pone un Areglo di Disputa, kual entretantu mester a tuma lugá via di un modifikashon di Art 12 den Statüt. Sosionan den Reino a logra laga Ulanda kombensé nan pa firma na 10-10-10 i primintí ku lo modifiká Statüt.

Un Areglo di Disputa ta importante pa nos demokrasia, pasobra e ta eliminá e poder unilateral di Ulanda. Ademas e ta implementá den Statüt, lokual Ulanda no por desviá for di dje. E intenshon di e Areglo di Disputa tabata pa kita poder for di e Hunta di Minister di Reino, unda Kòrsou i demas sosionan den Karibe no tin niun entrada ni tampoko poder ehekutivo. Ta lógiko ku Ulanda, nunka tabatin intenshon pa implementá un Areglo di tal índole unda nan ta pèrdè kòntròl riba e islanan den Karibe, prinsipalmente Kòrsou, Aruba, St. Maarten. Despues di a firma 10-10-10, sosionan den Reino na 2011 a tene nan promé konferensha di reino. Riba papel, e konferensha aki tabata nesesario pa mantené e asina yama “konsenso” den Reino Ulandes. Tur aña mester a tene un Konferensha di Reino, komo un posibilidat pa por evaluá e Leinan di Konsenso i nan konsekuenshanan. A opta na 2011, pa instalá 4 Grupo di Trabou, unu di nan speshalmente dediká na SOLAMENTE Art 12. Areglo di Disputa.

Despues di 2011, tabatin 2 Konferensha di Reino mas te na 2014. Tur e Gruponan di Trabou a bira no eksistente miéntras Areglo di Estado a wòrdu eliminá fo’i riba agènda. Nunka mas Areglo di Estado ni tampoko Konferensha di Reino a subi mes huntu.  Ulanda a skùif e diskushon pa e asina yama IPKO, Konsulta Parlamentario den Reino. IPKO, ta nada mas sino un show di kome i bebe pa tene parlamentarionan den region di Karibe kontentu. IPKO no tin ningun klase di poder ehekutivo ni por ratifiká ningun desishon polítiko den forma demokrátiko. Na 2011 i 2013, époka ku tabatin e Grupo di Trabou pa Art 12 Statüt, ekspertonan hurídiko di Kòrsou, Aruba St. Maarten i Ulanda tabata diskutí 2 dia largu riba e Areglo, miéntras tabata traha hinter aña riba desaroyo di esaki pa por presentá bek den Konferensha di Reino. Vigilante a yega di menshoná kaba IPKO no tin niun kapasidat pa desaroyá un Areglo di Disputa ni tampoko diskutí ariba.