Demanda di kastigu den kaso droga ku a keda hòrtá na warda reshèrshi

672
WILLEMSTAD,– Korte den promé instansia a trata un kaso basta serio unda 2 sospechoso a presentá pa responsabilisá nan mes.

Ta trata aki di Lionel Scharbaai di 42 aña i Julius Lucas di 37 aña ku mester tabata responsabel pa un kantidat grandi di droga ku mester a konfiská. Esaki despues ku mester a konfiská un lote basta grandi di kokaina, den laman aki na Kòrsou.

Tabata e hòmbernan Scharbaai i Lucas ku mester a bai ku un boto den serkania di Klein Kòrsou, unda aki a bin topa ku un boto. Fiskal a trese dilanti den e kaso aki ku e hòmbernan aki mester a bai warda e otro boto na Klien Korsou, unda aki a topa i mester a tuma algun bulto di droga.

Un kantidat di 340.660 gram di kokaina mester a keda konfiská, unda ámbos sospechoso a atmití ku nan mester a bai tuma e droga aki, pero nan a trese dilanti ku esaki no tabata di nan mes boluntat. Segun e sospechosonan ku nan mes a bai realisá un trabou na kas di algun kolombiano, unda na e bibienda aki mester tabatin hopi plaka.

Segun e sospechosonan ku tabata despues ku nan a kaba di kumpli ku nan trabou na e bibienda ku e kolombianonan mester a bin akusá nan di a hòrta plaka di nan. Nan a trese dilanti ku nan no a hòrta niun plaka pero e kolombianonan no kier a tende i a sekuestrá nan bisando nan ku nan mester hasi un trabou pa nan òf nan lo regla ku famia.

Lucas a trese dilanti ku e kos ei a kansa su kabes mirando ku e tin un yu di 5 aña i ku e no kier pa nada pasa su famia. El a trese dilanti ku a bisé lo mata tur su famia nan si e keda sin kumpli ku e trabou aki. Segun e sospechosonan ku nan mester a bai kumpli ku e trabou aki, unda despues nan a keda detené pero a bisa for di inisio ku nan no ta doño di e droganan.

A bin dilanti ku e droga aki mester ta un parti ku a keda hòrtá den warda di reshèrshi aki na Kòrsou, despues ku esaki mester tabatin algun tempu konfiská. Scharbaai kende ya a keda kondená den pasado pa kaso di droga a trese dilanti ku el a pensa ku ta algu malu ora a pone preshon, pero no tabata presisamente ku ta trata aki di kokaina.

Lucas tambe a keda kondená den pasado pa poseshon di droga, pero ta ninga di tabata sa algu adelantá ku ta trata aki di droga. Tabata un kantidat di 11 bulto ku a keda konfiská riba e dia en kuestion unda awor e hòmbernan aki tin ku para responsabel pa esaki segun Ministerio Públiko.

Fiskal mr. Koert a bisa ku e ta haña ámbos kulpabel den e kaso aki, mirando ku segun e fiskal e deklarashon di e sospechosonan no ta kuadra ku realidat. El a bisa ku ámbos ta kastigabel pa e echo aki unda el a pidi un kastigu di 7 aña pa e hòmber Scharbaai miéntras pa Lucas el a bisa di lo pidi ménos kastigu.