Residivista a kometé 3 echo kastigabel den algun luna di libertat

405
WILLEMSTAD,– Lutinel Sophia tabata dilanti wes ayera pa di tantísimo biaha despues ku el a kometé echo kastigabel.

Ta trata aki di un hòmber ku na vários okashon a keda detené aki na Kòrsou pa kasonan di ladronisia. E último biaha ku e hòmber aki a keda detené tabata dia el a hòrta kantidat basta grandi di plaka, unda despues el a bai parti esaki den bario na Banda Bou.

Lutinel a keda detené na 3 okashon segun fiskal den korto tempu ku e mester a rekobrá su libertat, miéntras tambe e tabata den tempu di prueba. E mester a kousa destrukshon na Campo Alegre 4 di yüli aña pasá, unda un testigu a mir’é kibra e bentana miéntras e mes a bisa ku kisas el a kometé e echo aki, despues ku e tabata basta fuma segun su deklarashon.

Tambe Lutinel mester a kometé un ladronisia na un bibienda unda a bin gar’é ku basta bòter di biña den su poseshon. El a atmití e echo aki tambe unda el a bisa di a bula e kurá di e bibienda pero no a kibra nada di e bibienda pa bai paden, esta no ta un kiebro. El a splika ku e porta tabata habrí unda el a kue 12 bòter di biña i bai kuné, miéntras a kapt’é den kámara riba e dia en kuestion.

Tabata aki ku a yama polis pa Sophia mitar di 1 di mardugá unda a bai mesora na e sitio i a logra detené e hòmber aki pa ladronisia di e bòter nan di biña. Riba e kaso aki Sophia a trese dilanti ku e tabata na kas unda el a pensa pa e bai  dal 2 drenks, unda ei el a bira malu i bai kometé e echo aki. El a bisa ku tabata na e sitio ku el a pèrdè kunes i kometé e echo aki.

E kaso aki a tuma lugá 29 di ougùstùs, unda e ta atmití di a trata na hòrta e bòter nan di biña. 9 di yüli tambe Sophia mester tabata den poseshon di un telefon hòrtá,unda esaki a pasa den aria di La Tasca. El a bisa ku e no a drenta den e negoshi pero un hòmber lo mester a bende e telefon aki unda el a kumpr’é pa 50 florin. Tambe el a splika ku e hòmber aki ya no tabata tei na e sitio ora polisnan a logra yega.

Tabata despues ku un bisiña di e víktima a yama e víktima bisando e ku tin moveshon straño na su bibienda ku a yama polis i despues a bin topa Sophia den serkania ku e telefon ku ta pertenesé na e víktima. Tambe a haña ku 200 florin den su poder unda el a splika ku e tabatin 250 florin primeramente pero el a kumpra e telefon serka un persona.

Segun wes na vários okashon el a kambia deklarashon. Primeramente el a bisa ku e la haña e telefon riba tonbank pero despues e mes ta deklará ku e no a drenta e negoshi. Wes na su turno a bisa ku mester wak ki reclassering i Ministerio Públiko ta konsehá pa hasi ku e sospechoso aki mirando ku bisto no tin yudansa mas pe.

Wes a trese dilanti ku na 2 okashon a manda e hòmber aki Brasami unda despues mester a sak’é for di e instituto, pa su seguridat. Tambe e tin 9 luna ta kologá riba su kabes, unda fiskal a pidi pa ehekutá esaki i tambe 18 luna di prizòn. Esaki mirando ku segun Ministerio Públiko no tin masha yudansa pe den instituto. Aktualmente e ta será den FOBA, unda el a bisa ku e situashon no ta masha bon. Wes a bisa ku e ta haña e petishon ta kuadra i lo honra esaki.