Temblor di 6.8 grado ta sakudí region amazóniko

73
E temblor tabata di 6.8 grado.

RIO DE JANEIRO – Un temblor di magnitut 6,8 grado a keda registrá na e Amazonia Brasilero, den un region den serkania di e frontera ku Perú i kasi deshabitá. Esaki segun loke a keda informá pa e Opservatorio di Temblornan di e Universidat di Brasília.

E temblor a tuma lugá na alrededor di 25 minüt pasá di 2 den un zona den serkania di e estado di Acre, na un profundidat di 575 kilometer. Esaki a keda kalifiká komo unu sin rísiko pa e institushon di temblornan.

E siudatnan mas poblá na alrededor ta Tarauacá, ku masoménos 40.000 abitante i na 90 kilometer di e sitio, unda a registrá e moveshon, tin Feijo, na masoménos 134 kilometer. Esaki ta konta ku un poblashon kalkulá na 30.000 persona.

Prensa regional a señalá ku e temblor a keda sintí tambe na Rio Branco, kapital di Acre, i na otro siudatnan di e estado i e region amazóniko. Esaki aunke ku den ningun di e kasonan no a registrá víktimanan i tampoko dañonan material di importansia.