Bolsa Aseguradonan Ennia sigurá den Kirby Corporation

283
Punda—E bolsa di aseguradonan na Ennia Caribe Leven, ta sigurá den  forma di un invershon sólido na e kompania estado un unidense Kirby Corporation. Parman International, ku Hushang Ansary komo e akshonista prinsipal, a laga transformá un suma di 282 mion dòler fo’i grupo Ennia Caribe, den forma di invershon den Kirby Corporation, un kompania ikono den transporte industrial marítimo na Houston Texas, Estádos Unídos.

Kirby Corporation ta asina sólido, ku su balor riba bolsa di balor estado unidense ta 7 biaha mas tantu lokual gobièrnu di Kòrsou ta generá anualmente na impuesto doméstiko. Kirby Corporation ta kapitalisá riba bolsa di balor di New York na 4 bion dòler estado unidense miéntras nan preis di akshon te ku 7 di yanüari 2019 a sera ku un oumento di 1.37% na 68.15 dòler.  2 siman pasá den un entrevista na Houston Chronicle, David Grzebinski, Direktor Ehekutivo di Kirby a konfirmá ku aktualmente Kirby ta e kompania di transporte marítimo di lancha,  mas grandi na Estádos Unídos. Kirby ta ópera un fleta di 250 toubot huntu kombiná ku mas di 1.000 lancha riba laman i riwnan na Estádos Unídos. Nan transporte marítimo ta konektá e popular Riw di Mississippi ku restu di Estádos Unídos miéntras riba e Intercoastal for di e Golfo di Mexico ku ta konektá na Estado Unídos, Kirby ta e medio di transporte mas dominante. Aparte di ta un lider riba riw di Mississippi, nan ta duna servisio industrial dor di bende ekipo i makinaria manera generator, motor, instalashon di energia nuklear industrial. Debí na un fleta asina grandi di toubot i lancha, Kirby Corporation ta den posishon di duna servisio èkstra na otro klientenan den mesun ramo miéntras durante temporada di orkan, hinter e kosta sùit na Golfo di Mexico ta dependiente di Kirby Corporation.

Prinsipalmente e negoshi di transporte marítimo na Kirby ta birando hopi fuerte. E kompania ta nr 1 den sektor di transporte marítimo di lancha (Barge).  Nan lanchanan ta transportá produktonan petro kímiko, produktonan petrolero rafiná manera djèt fuel, gasolin i diesel. Na desèmber último, Kirby a añadí un lancha tankero mas na su fleta di riba mil lancha. E kompania Fincantieri Bay Shipbuilding a entrega un lancha tankero na Kirby ku kapasidat pa transportá 155 mil bari (Refineria Isla ta produsí 330 mil bari pa dia). E fleta di lancha tankero bou di maneho di Kirby, tin un kapasidat total di 21.6 mion bari.

Nobo: Fincantieri Bay Shipbuilding a entrega un lancha tankero na Kirby ku kapasidat pa transportá 155 mil bari.

Riba 31 di yanüari próksimo, Kirby lo anunsiá nan resultadonan pa 2018. E anunsio ta importante pa invershonistanan riba bolsa di balor kende ta sigui e kompania. Na 2017, Kirby a hasi un ganashi di 231 mion dòler estado unidense. Esaki a representá un balor añadí di 3.87 dòler pa kada akshon.  Na 2016 e kompania a hasi un ganashi di solamente 34 mion dòler estado unidense. Pa Ennia Caribe Holding NV, e resultadonan di 2018 ta importante. Hushang Ansary, a atkerí su akshonnan den Kirby durante medio 2017.