Kambionan na 2017 tabata funesto pa konfiansa di Ansary na CBCS

179
Skalo—E vishon di Hushang Ansary pa transferí su interes invershonista  di Stewart and Stevenson pa Kirby Corporation, tabata funesto pa gerensha di Banko Sentral na Kòrsou inisiá un proseso pa Medida di Emergensha kontra di 6 kompania bou di Ennia Caribe Holding.
Hushang Ansary di yüni pa novèmber 2017, a trese kambionan grandi den su bolsa di invershon. E kambionan aki tabatin konsekuensha pa kompanianan bou di Ennia Holding na Gorsiraweg. E situashon na Ennia Caribe Holding ta sigui delikado, miéntras Banko Sentral ta tene aseguradonan dje kompania den insiguridat. Entretantu, Ansary for di yüni 2017 a anunsiá den un “kompra i benta di akshon”, ku Kirby Corporation balorá na 4 bion dòler riba merkado di kapital, ta kumpra unu di e  kompanianan di Ansary,  kual ta Stewart and Stevenson.
Esei a tuma lugá na yüni 2017 i na sèptèmber 2017, e grupo di Ansary a kumpra 8.8% bek den Kirby Corporation. Kirby a kumpra Stewart and Stevenson i nan a paga 50% den akshon i 50% na kèsh, esta aktivo den forma di likides. Na Kòrsou, direktornan di EC Investments, EC Holding, Ennia Caribe Holding mester a firma, pasobra den e transakshon di akshon tabatin 280 mion dòler balorá na bono manehá pa EC Investments i EC Holding. Ta trata di aktivonan, propiedat di Ansary den un konstrukshon kompliká. Ta sospecha ku e transakshonnan aki a trese un desbalanse den e konstelashon di aktivo na Ennia Caribe Holding.

Aktualmente, Banko Sentral di Kòrsou ta tratando a todo kosto pa logra rekuperá e aktivonan di Ennia Leven. Manera ta konosí,  den Korte di Distrikto na New York, Banko Sentral a buska rekonosementu di su medidanan imponé na Ennia Holding, riba teritorio estado unidense.