“Kleine Werf” a resultá chikí pa Kassav

336
Sigur nan a pone un rekòrt di hende riba “Kleine Werf”. Djasabra tras di lomba.
WILLEMSTAD,—-Djasabra último tabatin e presentashon di Kassav ku riba a bin selebrá nan 40 aña aktivo den farándula. T’asina ku loke ku hopi hende no a spera a sosodé despues di 12 or di anochi riba “Kleine Werf”, i esaki ta ku e sitio ariba menshoná a resultá chikí pa Kassav.

Nos tin ku bisa ku den luna di desèmber tabatin un aktividat di Urban ku a hala riba seis mil hende riba “Kleine Werf”. Mester bisa ku djasabra tras di lomba tabatin mas tantu hende riba “Kleine Werf” ku dia tabatin e aktividat di Urban, i esaki a keda proba di hende nan ku a bai ámbos evento.

Pues den otro palabra nos tin ku bisa ku Kassav a resultá chikí pa “Kleine Werf”. Hopi hende ku tabata sinta den e sekshon di VIP ku ta ariba i ku tin un bon bista riba e públiko, nan a yega na e konklushon ku djasabra tras di lomba lo mester tabatin mas ku 7 mil hende, asta tin ta tribi di bisa ku esaki por yega 8 mil hende.

‘E Mulina’, a drenta den kontakto ku Presidente di Fundashon J.A.G. Hubert “Juni” Aniceta, kaminda ku na promé lugá nos a yama pabien pa ku e bon trabou ku Fundashon J.A.G. a hasi i despues nos a bisé ku nos a puntra diferente hende ku tabata riba “Kleine Werf” djasabra tras di lomba i ku práktikamente tur a bisa nos ku nan ta kalkulá ku tin mas di 7 mil hende i ku asta tin di nan a bisa ku nan ta kere ku e por ta banda di 8 mil hende. Juni a bisa nos ku”Mi no por dunabu ningun kontesta ainda, pero den e siman aki ora ku nos kaba ku tur kos mi ta lagabu sa presis kuantu hende a bishita Curaçao Carnaval Village ku si mi por bisabu ta un éksito kompleto”. Pues manera ku Juni a bisa nos e siman aki nos ta bai sa kuantu ta e sifra final.