Mañan ta hasi nèt 1 aña ora ku kurpanan sin bida a spula yega kantu

Na Koraal Tabak

537
E bahia unda e kurpanan sin bida a spula yega kantu.
Willemstad—- Un situashon sumamente tristu por a mira aña pasa den luna di yanüari ora ku vários kurpa sin bida a spula yega kantu di ilegalnan ku kier a drenta nos Pais pa buska un mihó bida pero no a logra i a bin fayesé hoga.

Tabata Djárason 10 yanüari 2018   esta mayan ta hasi nèt 1 aña ku  Kòrsou  keda sakudí pa e notisia ku a haña 4 kurpa sin bida na parti nort di Kòrsou, esta na Koral Tabak.  Den promé instante tabata sirkulá informashonnan ku ta 38 hende tabatin riba un lancha. Despues a keda trese dilanti ku tabata trata di 2 lancha di kua 1 di nan a drenta bahia sin difikultat i ku e otro lo tabatin 20 hende ariba. Redakshon di Vigilante a bai hasi un investigashon den kuadro dje tragedia ku a tuma lugá. Pa nos investigashon nos tabatin kontakto ku hendenan di Vela Coro for di unda e lancha a sali. Pa kompletá e relato nos tabatin kontakto tambe ku un persona di aki ku tin vínkulonan ku esnan ku a keda na bida. Historia tras di binimentu dje lanchanan aki ta kompaña ku hopi sakrifisio. Segun nos a keda informá ta asina ku kada pasahero ta paga un suma di 1000 dòler of mas pa por logra sali for di Venezuela.  Pa lokual ta trata e biaha aki ta asina ku nos a keda informá ku na tres okashon a posponé esaki di sali for di Vela Coro. Na momentu ku nan a disidí pa hasi e biahe, tabata nèt promé ku 1:00 or di mardugá di djarason. E lancha ta destiná pa kue entre 15 pa 18 hende, pero pa e biahe aki a disidí na hasi un eksepshon i mal kalkulashon i pone 30 hende abordo.  E lancha a Sali ku direkshon pa  Kòrsou i riba kaminda kasi yegando tera, nan a enkontra problema. Vershon di un di esnan ku a skapa dje tragedia ta ku e lancha a dal den baranka di  piedra.  Na momentu ku e lancha a dal den baranka di piedra, esaki a keda afektá ku tur hende mester a bula na bordo. Ta asina ku miéntras ku nan tabata bulando na laman un tabata grita otro pa yudansa. E sufrimentu a kuminsá aki nan, paso nos a keda informá ku nan tabata eksperensia un situashon di pániko, debí ku olanan tabata dal nan kontra di baranka bai bek ku nan i hala nan abou. Kada biaha mesun proseso tabata ripití, esta dal nan kantu di kosta, hala nan atras i bai abou ku nan.  Esaki a trese kuné ku dado momentu esnan ku a logra skapa tabata tende ménos gritu di yudansa.

Tres biaha posponé
Nos a keda informá ku ta masha dia e biahe dje lancha aki tabata programa. Kada biaha ku nan tabata kla pa sali, nan tabata posponé esaki.  Tabata nèt en e dianan ku presidente Nicolas Maduro a anunsiá ku no ta permití trafikashon  ni di barku tampoko avion. E di 4 biaha nan a disidí ku djarason tabata e dia. Nan a pone pia abou ku djarason ta bira e dia.  Nan a sali ku masha konfiansa, ounke nan tabata sa ku ta riesgoso tumando kuenta dje echo ku nan tabata di mas riba e lancha. Manan ta hasi nèt 1 ana ora ku un grupo di Venezolano a bin perde nan bida den e laman brutu na e parti nort di Kòrsou. Ounke e suseso lamentabel aki  a trese basta dolo i tristesa e latinonan ta sigui riska nan bida den e laman brutu pa nabega bin Korsou pa bin buska un miho bida.