Ansary ku Parman International tei dal bèk!

278
Punda—Banko Sentral di Kòrsou, CBCS mester bai hala faha mara pa un “kontra atake” den korte sivil di parti di Parman International, Hushang Ansary i konsorsio di Ennia Caribe Holding.  Manera ta konosí riba 4 i 6 di yüli 2018 korte a emití dos dekreto sivil unda nan a permití pa CBCS imponé Medida di Emergensha 6 kompania den e struktura di Ennia Caribe Holding NV.. E Medida di Emergensha a risibí sosten tambe serka Korte di Distrikto na New York.

E sosten di korte na Kòrsou i New York ta basá riba e ponensha ku Ennia Caribe Leven no tin e kota di solvabilidat pa por kubri aseguradonan di bida serka Ennia Leven. Esaki ta un situashon ku tin aña nan  andando, pero entre yüni 2017 pa novèmber 2017, durante kambio di maneho na Banko Sentral di Kòrsou, Parman International BV kende te akshonista mayó den Ennia Caribe Holding NV , a transferí aktivonan for di riba balansa di e konsorsio pa atkerí otro kompania anotá riba bolsa di balor na New York. Pero en realidat, nada no a kambia riba balansa finansiero di e kompania EC Investments i Ennia Caribe Leven. EC Investments ta e kompania intermediario ku Ennia Caribe Holding a uza pa transferí e aktivonan. E transferensha i akshon di benta i kompra den otro kompania anotá riba bolsa di balor na New York, tin di haber ku un kompania, Stuart and Stevenson (SS). E kompania Stuart and Stevenson ta un kreashon i “baby” personal di Hushang Ansary i na yüni 2017, un otro kompania ku yama Kirby Corporation a ofresé nan interes pa kumpra Stuart and Stevenson. Pero Ansary tabatin Stuart and Stevenson mará na e struktura di Ennia Caribe Holding via di Parman International BV..

E transferensha di aktivo di parti di Ansary i Parman International tabata konfuso pero lógiko. Pa por a permití e kompra di Stuart and Stevenson tuma lugá, Ansary mester a ordená pa skùif e aktivonan tambe. E transakshon di benta  di Stuart and Stevenson pa Kirby Corporation no a kambia e balans finansiero ni di EC Investments ni tampoko di Ennia Caribe Leven NV.  Ennia Caribe Leven NV ta keda mantené un asina yama “intracompany loan” (vordering) riba EC Investments. EC Investments di su parti ta keda anotá riba su balans finansiero e bono nan (aktivo) di Stuart and Stevenson, balorá na 282 mion dòler estado unidense. De fakto, interpretando e lógika den e struktura di e transferensha di Stuart and Stevenson pa Kirby, e impakto ta minimal riba Ennia Caribe Leven. Solamente ta keda e diskushon di hopi aña kaba, ku e solvabilidat di Ennia Leven NV ta sigui den peliger. Pero esaki tabata e kaso kaba for di entre 2006 pa 2017, durante periodo ku Ansary a aglomerá Stuart and Stevenson den un kompania atraktivo pa kompra i benta riba bolsa di balor na New York (American Stock Exchange).

Kirby Corporation na momento nan a kumpra Stuart and Stevenson nan a paga 50% den akshon i 50% den kèsh. Esaki a sosodé den un Purchase and Sell agreement ku Hushang Ansary. Ansary despues a risibí partisipashon den Kirby. Ansary tabata por a ehersé e purchase and sell agreement, pasobra Ennia Caribe Leven via di EC Investments tabatin e bono nan di Stuart and Stevenson na balor di 282 mion dòler. Ennia Caribe Leven, ta keda ku dos “vordering” den forma di debiteuren riba EC Investments. Un parti ta e 282 mion dòler den bono di Stuart and Stevenson pero tambe e balor di e tereno na Mullet Bay St. Maarten ku ta balorá na 460 mion florin.

Parman International ni tampoko e konsorsio di kompanianan bou di EC Holding, nunka no a protesta e dos dekretonan emití pa korte sivil na Kòrsou riba 4 i 6 di yüli 2018. Esei no tabata un prioridat pa Parman International tampoko, te na momento ku korte di distrikto na New York a aseptá e Medida di Urgensha riba teritorio estado unidense. Promé ku esei, CBCS, esta Banko Sentral no por tabatin akseso na e aktivonan di Parman i Ansary den Kirby Corporation i kisas tampoko den un di dos kompania ku Ansary a kumpra despues na sèptèmber 2017, Nabor Utilities/Industries. Pero Parman International di Hushang Ansary ta preparando un atake fuerte bek, basa riba e dos dekretonan di korte sivil riba 4 i 6 di yüli 2018. Ámbos dekreto a imponé e Medida di Emergensha den 6 kompania di Ennia Caribe Holding NV i imponé e maneho propio bou di guia di Banko Sentral. Pero e dekretonan di korte na Kòrsou, tabata basá prinsipalmente riba un intento pa saka mas aktivo balorá na 100 mion dòler for di EC Investments. Hinter e struktura kon e282 mion dòler na aktivo tabata aloká bou di Ennia Caribe Leven i EC Investments a keda fo’i e dos dekretonan na yüli 2017.

Jose Jardim i Banko Sentral a inisiá kiebro di e imperio ku Hushang Ansary tabatin den supervishon na Banko Sentral. Tur e seis kompanianan unda Banko Sentral tei imponé un Areglo di Emergensha, ta kai bou di Ennia Caribe Holding. Ennia Caribe Holding ta un kompania propiedat di Parman International B.V.. Hushang Ansary huntu ku su esposa ta propietario solitario di Parman Capital Group. Parman Capital Group tin derechi di atkishon riba EC Investments, kual kompania Banko Sentral ta sospechá tabata e kanal pa plania na saka 180 mion florin for di a bolsa di aseguradonan di Ennia Leven na mei 2018.
Jose: CBCS ta supervisando maneho na Ennia bou di wowonan di Jose Jardim.
Aparte di Parman, e kompania Frank C Carlucci III Revocable Trust tambe tin derechi di atkishon riba akshon for di EC Investments registrá na Kòrsou bou di Ennia Caribe Holding. E kompania ta propiedat di Frank Charles Carlucci III kende a sirbi gòbièrnu di Estados Unídos komo sekretario di defensa.
Awor, EC Investments ta un supsidario di Ennia Caribe Holding, kual na su turno ta un propiedat di Parman International BV., un kompania privá di invershon unda Ansary tin mayoria na akshon miéntras Frank Carlucci kende a fayesé ku 87 aña na yüni 2018, tin minoria huntu ku esposa di Ansary. Hushang Ansary ta president komisario di e Hunta di Ennia Caribe Holding NV. Crystal Carlucci famia di Frank Carlucci tambe ta den hunta di supervishon di Ennia Caribe Holding.