Bolsa aseguradonan Ennia Leven invertí den kompania mas grandi ku Kòrsou

100
Kuestioná: Abogadonan di Ansary awe tei kuestioná e súplika di CBCS di 4 i 6 di yüli 2018.
Punda— Klientenan di Ennia Leven, por ta mas òf ménos trankil. Hushang Ansary, propietario di e konsorsio di Ennia na Kòrsou a invertí parti di nan bolsa den un kompania ku ta dos biaha mas grandi ku Kòrsou, esta den tèrmino finansiero. Kirby Corporation, te ku ayera tabata anotá riba bolsa di balor estado unidense na 4.1 bon dòler estado unidense, kual ta dos biaha e produkto brutu nashonal di Kòrsou.

Riba 13 di sèptèmber 2017, Hushang Ansary a kumpra 8.8% di akshonnan emití den Kirby Corporation. Riba e fecha en kestion, e invershon tabata bal 334 mion dòler estado unidense. E suma ta representá pa 8.8% di 3.8 bion dòler, pa lokual Kirby su balor riba merkado kapitalisá tabata riba 13 di sèptèmber 2017. E balor di Kirby riba mesun índise di kapitalisashon segun bolsa di balor te ku ayera, 9 di yanüari 2019, tabata 4 bion dòler. Esaki ta nifiká ku Kirby Corporation entre sèptèmber 2017 pa yanüari 2019 a subi ku 200 mion dòler na balor. E invershonnan di Hushang Ansary den Kirby a oumentá di tal forma, lokual ta representá un oumento di 16 mion dòler. Pa EC Investment i Ennia Caribe Holding na Kòrsou,  e oumento no tin nifikashon den sentido di ganashi, pero ta un índise di stabilidat den terminologia di invershon.

Awe den korte, e diskushon tei bira si Ennia Caribe Holding i Parman International di Ansary por garantisa ku no tin peliger pa e bolsa di asegurado na Ennia Caribe Leven. Den desishon/dekreto di Korte Sivil di Promé Instansha, Banko Sentral a risibí outorisashon legal pa imponé un Areglo di Emergensha riba e grupo di kompania aseguradó Ennia. Ta trata di  e kompanianan Ennia Caribe Leven, Ennia Caribe Schade, Ennia Caribe Zorg, EC Investments BV, Ennia Caribe Holding NV i EC Holding NV.

E Areglo di Emergensha a enserá ku Banko Sentral ta tuma maneho di e bolsa di invershon i finansiero mas aspektonan logístiko di e kompanianan di Ennia menshoná. E motibu prinsipal: na yüli 2018, Banko Sentral a kombensé korte pa   sospechá intentonan serio di parti di e manehadónan di Ennia pa pluma e bolsa di kreditornan (e.o. seguradonan/klientenan) di e kompania. Segun e wes kende a emití e dekreto na yüli 2018, mr. Sijsma e konsorsio di Ennia ta representá riba 50% di e merkado di asegurado na Kòrsou i St. Maarten miéntras na Kòrsou nan tin 80% dje merkado di penshun.  E struktura di e kompanianan kual Banko Sentral ta pone na disputa, tin 1.5 miar na propiedat aktivo den forma di fiansa i kobransa. E suma di aktivá aki ta repartí den forma di sombra finansiero den e kompanianan Ennia Leven, Ennia Schade i Ennia Zorg. Esaki miéntras EC Investments i Ennia Holding ta manehá e bolsa di invershon.

I ta netamente den e último aki ku Banko Sentral a bati alarma! Segun alegashon sivil di Banko Sentral nan ta sospechá i premirá ku manehadónan òf èks manehadónan di e grupo di Ennia kier a saka e bolsa di seguro fo’i Kòrsou i pafó di Ennia. Riba 3 di yüli 2018, Banko Sentral a entrega un petishon na korte sivil pa un Areglo di Emergensha. Segun Banko Sentral, Ennia tin problema serio di solvabilidat. Esaki ta su kapasidat pa por garantisá pago na kreditornan. Den e kaso aki su aseguradonan. Den nan sospecho, Banko Sentral  a menshoná spesífikamente ku direktornan di Ennia i akshonista prinsipal Ansary a ninga di sigui nan liña di konseho. Korte a duna Banko Sentral outoridat pa pone maneho di Ennia bou di supervishon di  Banko Sentral riba 4 i despues 6 di yüli 2018.

Pero lokual wes Sijsma no a konsiderá ta e invershon ku Ansary i Parman International a hasi na sèptèmber 2017 den Kirby Corporation. Esaki ta un puntp importante mana durante tratamentu. Segun alegashon di Banko Sentral, den korte sivil, e kompania EC Investments BV ku ta pertenesé na grupo di Ansary kier a “slùip” saka 180 mion florin for di Kòrsou. Segun CBCS, ta trata di sèn ku aseguradonan a invertí den  seguro i penshun. Banko Sentral ta sospechá ku e plaka aki lo a wòrdu saká fo’i dje bolsa di invershon di Ennia i depositá riba kuentanan di Merryl Lynch na New York. E dekreto di korte a kousa hopi konfushon. Segun Banko Sentral, EC Investments ta risibí e sèn fo’i otro kompanianan di Ennia i ta trata di primordialmente kota di pago (premie for di e aseguradonan) pa haña tur forma eksistente di seguro i di penshun.