Dos hòmber sospechá di a sekuestrá dama for di India dilanti wes komisario

For di djadumingu den oranan di anochi a detené nan

327
Willemstad— Djadumingu den oranan di anochi Polis a logra di detené dos hòmber sospecha di a hasi nan mes kulpabel na un kaso di sekuestro.

 

Tabata for di djabièrnè  siman pasa den oranan di anochi a kuminsá pidi búskeda di un dama S.M. ku ta nase na India  i ku tabata studiante di St Martinus University ku ta keda den Otrobanda. For di investigashon realisá a bin Sali na kla ku e dama tabata para na un parada di bus wardando transporte pa por yega na e sitio unda e tabata keda. Amigunan a trata di drenta kontakto kuné pero no por a hañ’é i mesora a bai na e sitio unda nan tabatin kontakto kuné pa e delaster biaha ku tabata na e parada di bus. Einan a bin topa ku su sapatunan so ku a keda atras i mesora a bati alarma ku algu malu mester a pasa e dama. A bai na Polis pa asina por a entrega un denunsia pero den kaso di hende pèrdí mester a warda 24 ora pa asina por a saka un petishon di búskeda di e dama. Entretantu polis mes a haña mas informashon ku den e kaso aki ta trata di un kaso di sekuestro. Mesora a kuminsá ku un investigashon mas dirigí i tabata djadumingu den oranan di anochi a logra di realisá e promé dos detenshon den e kaso aki.

Yu di Kòrsou ku a hinka su kurpa den un kaso basta serio.

Ta trata di un hòmber yu di Kòrsou i tambe un di India ku a keda arestá pa e kaso di sekuestro di e dama ku tambe ta di India. A logra di reskatá e dama sano i salvo miéntras e dos sospechosonan a keda enkarselá pa e kaso di sekuestro. Ayera den oranan di dia e dos sospechosonan a keda presentá dilanti wes komisario unda ámbos su detenshon a keda alarga ku ocho dia mas. No ta konosí pa Vigilante ki laso e hòmber di India tabatin ku e dama ku tambe ta di India ku esaki por a bin kulminá den e kaso di sekuestro. E kaso ta den  investigashon.