Hòmber sospechá di a paga den kaso asesinato na Hato a yega Kòrsou

Despues di tabata 4 aña profugo di lei

660
Yegada di e koloso KLM riba kual e sospechoso a keda trasladá pa Kòrsou.
 Willemstad—  Ayera den oranan di atardi e hòmber ku tabata wòrdu buska pa kuater aña den e kaso di Hato Shooting unda dos víktima a bin pèrdè nan  bida a wòrdu trasladá pa Kòrsou despues di e keda arestá na Hulanda.

Tabata den luna di desèmber outoridatnan na Hulanda a logra di detené  en sospechoso  C.B. di 32 aña  ku tabata pone riba e lista internashonal pa wòrdu buska i arestá.  Ya pa un tempu a señalá e sospechoso aki na Hulanda i tabata siguié pa asina e keda arestá. Djabièrnè dia 28 di desèmber 2018 outoridatnan a haña e mihó chèns pa detené e sospechoso na momento ku e tabata sinta den un vehíkulo kantu di kaminda. Den  e kaso aki  ta trata di un BMW.  Tabata na altura di Zouterwoude-Rijndijk na Zuid Holland ora ku e sospechoso tabata sinta den e vehíkulo kantu di kaminda riba snelweg ku e tim di aresto na Hulanda a aserka e sospechoso i a detené.

Mesora a detené e sospechoso C. B Di 32 aña sospecha di asesinato premedita, asesinato i tambe soborno. E sospechoso aki ta wòrdu sospecha di sa algu di e kaso di asesinato ku a tuma lugá na aña 2014 na Hato ku a hala basta atenshon unda dos hòmber a keda asesiná den e kaso aki esta e víktima Djais i tambe su primu Arnhem tur dos di e bario di Buena Vista ku tabata forma parti di e geng BVC. Durante investigashon ku a sigui den e kaso aki a bin detené un agente polisial kual ta esun ku a duna e detaye i tambe informe ki ora e víktima Djais lo mester a yega Kòrsou pa asina e keda likidá nèt na e salida na Hato. E agente Polisial ku ya entretantu a bin rekobrá su libertat despues di a sinta su kastigu na Hulanda mester a deklará ku e la haña preshon di e sospechoso ku a keda arestá awor na Hulanda pa asina por a dun’é informashon di e víktima Djais.  E tempu ei asta e eks Polis X. Mester a deklará ku e tabata na Merka ora e la haña e informashon di e yegada di e víktima Djais i asina a tuma kontakto ku e sospechoso C.B. ku tabata buska Djais pa likidá debí ku e tabata bisa ku Djais den un ripdeal mester a kita droga for di dje.

Despues ku e asesinato na Hato a tuma lugá e polis entretantu a yega Kòrsou i segun su deklarashon tabata na altura di Palu Blanku e mester a bai  i a tuma su ènvelòp di plaka pero no a konta esaki. Ora e la yega kas e la bin tuma nota ku falta 15 mil florin pero nunka mas e no a haña esaki. Ku e plaka e la kumpra un outo kual a keda konfiská pa Ministerio Públiko. Ayera Djárason 9 di yanüari 2019, alrededor di 17.55or di atardi, personal di Tim di Aresto riba òrdu di Ministerio Públiko a buska un sospechoso ku a wòrdu trasladá pa Kòrsou for di Hulanda na airopuerto Hato. E detenshon ta den kuadro di un investigashon penal ku ta andando relashoná ku e kaso di “Hato Shooting” ku a tuma lugá den yüli di aña 2014 den e área di airopuerto Hato. Ta trata di e hòmber:  C.R.G.B., 32 aña di edat, alias True  nasé na Kòrsou, A presentá e sospechoso dilanti un Fiskal Ouksiliar ku a ordená su enkarselamentu pendiente di mas investigashon. Si Vigilante tin ku bisa ku den e kaso aki no ta bai trata di un kaso fásil mirando ku ta e deklarashon  di e eks Polis so kontra di e sospechoso C.B. ku sigur lo bai para riba ku e no sa di nada. Sigur aki Ministerio Públiko tin ku bai hasi su “ Huiswerk” si no esaki lo bai bira un otro gòlpi pa nan.