Kolegio Sta Clara a habri aña di Ka’i òrgel Cristal

127
Alumnonan atento riba splikashon kon ta toka un Ka’i òrgel.

WILLEMSTAD,—-Durante diskurso di kambio di aña na Brion Plein nos Minister di enseñansa, sensia, kultura i deporte Sra. Alcala Walle, a indiká ku aña 2019 ta aña di Ka’i Òrgel.

Pa e motibu aki, maestro nan di kolegio Sta. Clara a pèrkurá pa trese un ka’i Òrgel skol pa asina di un manera ofisial habri aña di Ka’i Òrgel huntu ku alumnonan durante nan “weekopening”. Sr. Rudsel Wawoe di Ka’i Òrgel Cristal huntu ku Yeki  ku a toka wiri a sa di pone bon ambiente.

Tambe alumnonan a haña un splikashon kòrtiku serka Sr. Rudsel i tambe Sr. Tirso Fransisca di kon e Ka’i Òrgel ta hinka den otro i tambe kon esaki ta wòrdu usa. Algun alumno i tambe maestro a haña e oportunidat pa asina toka e Ka’i Òrgel i tambe e wiri.

Ta hopi great pa mira kon e mucha hòmber Yeki, ta dominá e instrumènt wiri. E mes a indiká ku for di su 6 aña e tabata toka e instrumènt aki. E tabata para riba un stul banda di e Ka’i Òrgel pa asina e kompañá e piesa ku su wiri. E hóben aki sigur tabata un estímulo pa e muchanan ku na momentu ku nan a mira kon e ta toka e wiri, nan interes a lanta pa sa mas di e instrumènt aki.  Durante e aktividat, alumnonan i tambe maestronan a wòrdu honra ku bishita di Sra. Lizette Sambo – Velder Direktor di sektor di kultura i deporte.

Esaki sigur tabata un sorpresa hopi agradabel. Durante e aña aki, Kolegio Sta. Clara lo bai pone mas atenshon na Ka’i Òrgel, ku ta un herensha di nos kultura. Ta hopi importante pa pasa e konosementu aki pa e generashon ku ta bin. Banda di e enseñansa, Kolegio Sta. Clara ta kere hopi den desaroyá i òf stimulá talento di nan alumnonan.