Sifra di mortonan den tiroteo registrá na Playa del Carmen ta alkansá 7

98
Outoridatnan pafó di e sitio unda e tiroteo a keda registrá.

CIUDAD DE MEXICO – E sifra di víktimanan mortal den un tiroteo registrá den un bar di Playa del Carmen, na Caribe mehikano, a subi i alkansá shete despues di fayesementu di un di esnan ku tabata gravemente heridá den sentro médiko.

E fiskalia general suroriental di e estado di Quintana Roo a duna di konosé ku seis persona a pèrdè nan bida na e sitio di e echonan i un di shete na un sentro médiko, unda el a keda interná.

A deskartá ku tabatin turista entre e víktimanan di e suseso aki, kua a sosodé den un bario popular di e sitio turístiko.

Te ainda no konosé mas dato relashoná ku e number di personanan ku a resultá heridá i tampoko di esnan ku a keda detené.

Dos hòmber a drenta den e lokal Las Virginias na alrededor di 8or di anochi di djadumingu último i a hasi uso di un arma di kaliber haltu pa lòs bala. Seguidamente esaki nan a sali for di e sitio di e insidente i a hui den un vehíkulo.

E suseso aki a laga kòrda mesora riba e tiroteo di dia 16 di yanüari di aña 2017 den un diskotèk popular Blue Parrot, kua a laga saldo di seis morto i mas di 15 herido na e Playa del Carmen. Esaki durante un festival di músika elektróniko, debí na un disputa entre trafikantenan pa e benta di droga.

Diferente for di Blue Parrot, ubiká den un zona di hotèl i restorantnan, e establesimentu tabata situá den e siudat i tabata keda frekuentá mayoriamente pa residente nan di e lokalidat mes.

For di aña 2017 e violensia a ekstendé na gran parti suroriental di e estado di Quintana Roo, kua ta risibí un kantidat importante di turista i divisa ekstranhero. Esaki pa e supuesto problema entre Kartel Jalisco Nueva Generacion i Los Zetas i otro gruponan deliktivo pa asina por kontrolá e region.