Tahith Chong mes i desishon “oro” di su tata tine awe den Man U

86
Tahith Chong mes i desishon “oro” di su tata tine awe den Man U
 

 

MANCHESTER,  – Manera Deporte Internashonal di Vigilante  a informabu algun dia tras e pèrla di Manchester United, Tahith Chong, a debutá ku e ekipo prinsipal di Old Trafford.  Miéntras awe nos lo publiká un entrevista ku “ELF voetbal” tabatin ku  e orguyo di Wishi Marchena

 

Ta hopi remarkabel ku su kabei no manera kos ku e ta hinka gel aden sino artefaktonan eksplosivo pa asina tene nan den e moda ku nan ta.  Su wowonan ta manera kos ku ta skonde tras di dos kortina. Su kabei (kapsel) ta manera ku e ta len “steun” riba un kos.

Tahith Chong no tin pia manera di un futbolista profeshonal. Pero loke  e ta falta na forsa e tine di mas ku e moveshon di kurpa i téknika ku ta poseé. Ku su postura di kurpa e tin bentaha pa hasi e kosnan ku e ta hasiendo aktualmente riba tereno. E tin solamente djesnuebe aña i awor e ta parti di un dje ekiponan mas karu na mundu ku ta  Manchester United.  E dia promé  ku biahe pa e debut di Chong tabata unu grandi, aunke e tabatin vários grandi mas tras di lomba.

Tur e aventura aki a kuminsá ku un “gokje” di su tata Jose “ Djo” Chirino.  

Kon tur kos a kuminsá na CURAÇAO

Ocho aña  Tahith Chong tabatin, pero niun hende na Kòrsou no tabatin un respuesta e dribling ku e tabatin. Kontrinkantenan nan no tabata sa kon pará e orkan di nòmber Tahith ora esaki pasá banda di nan.

No tabatin nada mas ku tabata hasi e gai chikí Tahith mas kontentu ku hunga bala. E la hunga pa dos ekipo na Kòrsou di kua promé tabata Excellence, miéntras ku despues e la pasá pa  Atlétiko Saliña. Pero segun tata di Chong e tabata por mas ku esaki mirando su talento, porsierto ku konosé e wega paso e tambe a hunga bala.

Chong a bisa ku ta asina e kortina a habri pa su karera.

E yu di Kòrsou ku tabata wak ku dos wowo amigabel i humilde durante dje entrevista a konta ku:  “ Mi tata tambe a hunga bala. E la hunga na Kòrsou i tambe den amatùr na Hulanda.  Dus e sa basta kos dje deporte. E tabata haña ku na Kòrsou mi a yega mi máksimo nivel i tabata ke p’ami sigui desaroyá mi talento.  E por balansa e nivel di Hulanda i esun dimi, i tabata pensa ku ta bale pena nos purba nos suerte”.

E purba suerte “gokje” tabata di kambia Kòrsou pa  Rotterdam ku hinter famia. Na un Hulanda  Tahith a sera konosí ku otro temperatura, ku promé ku esaki solamente e la sinti ora saka un bleki  cola for di ijstkast (frishidaire).

“Danki dios mi tabata por a papia algu di hulandes for di Kòrsou, aunke mi mester a kustumbrá ku e tono “uitspraak”.

E akostumbrashon a bai tòg hopi bon, segun Chong a duna di konosé. “Bo sa komo gai chikí bo no ta sinti hopi di esaki. Mi ta kere p’ami mayornan e tabata hopi mas duru. Ami solamente tabata “bezig” ku hunga bala, i no tabata pensa nada otro. Anto hunga bala tabata bai dushi na Hulanda,  dus ami tabata hopi kontentu”.

Otro wer pero mesun pashon.

“Si mi bai bek na mi tempu na Kòrsou  mi ta pensa prinsipalmente na futbòl ku mi amigunan. Ami tin rekuerdo bon so di  mi hubentut nami Isla. Durante vakashon semper mi ta trata di bai bek.   Bishita famianan i amigunan. Mi ta gosa masha hopi di esaki”.

FEYENOORD

Chong su tata a haña rason basta lihé. E tabatin mester di solamente un partido di tèst ku Feyenoord pa asina kombensé e organisashon kiko “dribbelaar” dje isla trópiko por hasi. Chong a hari ora e la bai bek pa kòrdá riba e wega aki.

“Tabata kontra di PSV. Nos a ganá 4-0. Mi a hunga bon, mi tabatin tres assists. Despues mesora mi por a drenta e hala hubenil di Feyenoord. Mi ta hopi gradisí na Feyenoord pa esaki. Nan a mira mesora kiko mi por hasi i a guiami sumamente bon tambe”.

Apesar di esaki nunka e fanatikonan di De Kuip  no a mir’é hunga den e promé ekipo. Djeseis aña  Chong tabatin ora ku Manchester United a busk’é. Nan mester hasi tòg un poko lihé paso tabatin vários ekipo grandi di Europa  ku tabatin interes den e internashonal hubenil.

Chong a skohe pa  United i tabata e blanku pa un kantidat di krítika, pa loke ta su pas’é asina lihé pa Inglatera.

Tabata promé biaha den e entrevista ku e sonrisa di Chong a bai for di riba su kara.

“Mi a lesa ku e hendenanan tabata bisa ku tras plaka mi bai (geldwolf). Nada di esaki no ta bèrdat. En prinsipio komentarionan asina aki tabata lagami rabia,  pero esakinan ta kosnan ku mi mester siña deal kuné. Komo futbolista profeshonal bo no por yuda ku hende ta bai tin opinion dibo.  Ora mi a bai Inglatera mi hasié pa un inovashon nobo ( uitdaging). Semper lo mi ta gradisí na Feyenoord pa tur kos ku nan a dunami durante e ocho añanan ku mi tabata ayanan, pero tin biaha ta bon pa purba kos nobo.

Despues deporte Internashonal di Vigilante lo ku e di dos parti dje entrevista, pa loke ta komienso i aktualidat den Manchester United.

Fot djo chirino: Tahith Chong (L) huntu ku su tata Jose “ Djo” Chirino durante trainings camp di Man U na Estádos Unídos. Tur kos a kuminsá ku e inisiativa di “ Djo” pa bai ku “Itu” Hulanda (Feyenoord).