Tres spañó i un peruano ta fayesé den un avalancha na Perú

76
E guia inisialmente a keda hañá na bida despues a bin fayesé.

LIMA – Tres spañó i un peruano a fayesé na Los Andes di Perú pa kousa di un avalancha ku a keda registrá. Esaki miéntras ku otro persona mas, tambe spañó, tambe a logra sobrebibí.

Un bosero di e unidat polisial di e sitio unda e insidente a keda registrá, a indiká ku e grupo a koroná e nevada Mateo, den e region di Ancash, na sentro di Perú i ku mas di 5 mil meter di altura. Esaki na momentu ku nan a keda sorpresá pa e avalancha den oranan di djadumingu tras di lomba. Esaki nèt na momentu ku nan tabata prepará pa baha.

Un di e kompañeronan, di nashonalidat spañó, a duna alerta relashoná ku e aksidente i e kurpanan a keda lokalisá den e anochi di djadumingu.

Un total di mas ku dies agente polisial di Alta Montaña ta trahando for di djadumingu último i durante henter dia di ayera den reskate di e kurpanan, pero esaki nan lamentablemente ta keda strobá pa e mal klima pues áwaseru ta retrasá su labor i no tin komunikashon di e zona.

Un bosero polisial a splika ku e montañistanan a sufri kaida di un kantidat grandi di sneu na 100 meter di e kumbre. Na momentu ku esaki nan a disidí di bira bèk, aparentemente un a slep i a hala e sobránan ku tabata mará na e mesun kabuya.

Esnan ku a pèrdè nan bida, identifiká pa medionan di komunikashon di e pais komo Adrin San Juan Pello, Sergi Porteros Perello i Garard Borrul Regal i tambe e guia peruano Rubén Dario Alva, lo keda hibá pa outoridatnan polisial te kampo base di e nevado i di aki pa un sentro médiko na e provinsia di Carhuaz.

E spañó sobrebibiente, identifiká komo Paolo Belmonte Calderon, a keda evakuá den oranan di ayera pa e klínika di e siudat di Huaraz, kapital di Ancash, pa asina keda tratá di su leshonnan.

E avalancha aki a lastra e kurpanan na aproksimadamente 200 meter, na momentu ku nan tabata regresá for di montaña, esaki despues ku nan a yega e kumbre di nevado Mateo i ta presumí ku e aksidente lo a sosodé na alrededor di oranan di mèrdia di djadumingu último.

Un ekipo di e unidat di salbamentu di outoridatnan i di e Asosashon di Guianan di Montaña a haña e guia peruano na bida, pero esaki a bin fayesé algun minüt despues debí na leshonnan ku el a sufri.