Venezuela un biaha mas ta akusá Estádos Unídos pa supuesto plan golpista

169
Presidente venezolano, Nicolas Maduro.

CARACAS – E gobièrnu venezolano a akusá Estádos Unídos un biaha mas pa supuestamente ta tras di supuesto plannan intervenshonista na Caracas, ku ta buska pa saka e presidente di e pais, Nicolas Maduro, for di poder. Esaki mediante akshonnan violento.

Den un komunikado ofisial, e asina yamá revolushon bolivariano, a denunsiá un biaha mas dilanti komunidat internashonal, e intento di e gobièrnu di Estádos Unídos pa realisá un gòlpi di Estado kontra e gobièrnu di Maduro.

E nota a keda divulgá riba retnan sosial pa Jorge Arreaza. Den esaki e ta kritiká ku Washington no ta rekonosé e institushonnan legítimo i demokrátiko di Estado venezolano.

Esaki a sigui indiká, ku den dianan resiente, boseronan di e gobièrnu estadounidense a provoká un seri di akshonnan hostil pa asina supuestamente manipulá e bèrdat ku propósito di kibra e stabilidat institushonal i pas di Venezuela.

Den mesun rosea, e ehekutivo di Maduro, ta kuestioná ku Estádos Unídos ta pretendé di otorgá balides selektivo na e institushonnan di poder públiko venezolano. Esaki rekonosiendo Parlamento, kontrolá pa oposishon i pa kritiká e gobièrnu i otronan na poder.

Den e komunikado, Venezuela a indiká ku Estádos Unídos tambe ta rekurí na gobièrnunan supordiná di e region i ta dikta òrdu pa asina profundisá blokeo kontra e pueblo venezolano.

E nashonnan aki a pidi Maduro den e siman tras di lomba, pa no asumí su mandato presidensial nobo dia 10 di yanüari próksimo. Esaki nan a sigui indiká ku nan lo no rekonosé esaki su legitimidat pues el a triunfá den elekshonnan ku oposishon no a partisipá na dje pa motibu ku tabata konsiderá nan froudulento.

Den e nota aki, Venezuela ta indiká ku for di aña 2002 Estádos Unídos a dediká su mes na promové, apoyá i finansiá akshonnan violento kontra e konstitushon i leinan venezolano ku ophetivo di generá un kambio. Esaki pa di e forma aki nan rekuperá kontrol di e rekursonan energétiko i mineral di e pais.