A seya tur tankinan yená ku gasoil

Wardando e pèrmit di molèster

199
A konstatá generator ku tabata muchu pega ku e tankinan.
Willemstad— Mirando ku e establesimentu Inter Caribbean Shipping Company no tabata disponé di un hinder verordening e asina yama pèrmit di molèster, ayera a seya tur e tankinan yena ku kombustibel te na un próksimo aviso.

 

Ayera un biaha mas e tim multidisplinario a bai na e kompania Inter Caribbean Shipping Company ku ta keda den e parke Industrial na Heintje Kool pa asina hasi mas investigashon enkonekshon ku e presensia di un kantidat di diesel ku a ser almasena den diferente tanki riba e tereno. A bai ku diferente eksperto di diferente instansha pa asina por a akumulá tur e puntonan ku tin mester pa asina ora por almasena kantidat grandi asina di kombustibel. A bin tuma nota di diferente infrakshon riba e tereno kual ta ku tabatin generator muchu serka di e tankinan yena ku gasoil. Tambe a bin ripara ku e kompania no ta disponé di un hinderverordening na momento ku e control tabata tumando lugá. Esaki a pone ku mesora a laga seya tur e tankinan di manera ku no por saka kombustibel for di esaki bai repartié niun kaminda. Mas lat por a komprondé ku den oranan di atardi e petishon pa e hinder verordening mester a drenta na e instansha konserní i ku awor ta bai hasi e demas investigashonnan na momento ku ta trata kualke pèrmit ku ser pidi. Ta trata di un kantidat di gasoil ku a yega Kòrsou den un barku for di den luna di desèmber ku tabata destiná pa negoshinan aki na Kòrsou i no pa benta lokal ku outomobilistanan. E intenshon tabata pa saka e kombustibel for di e  barku bai hiba esaki dirèkt na e negoshi pero kosnan a bin pega kual a pone ku e kompania a disidí e ora ei pa almasena esakinan den tankinan ku e tabata disponé di dje i ku tabata pone riba su tereno. Esaki ta kontra di lei i tambe na momento ku a hasi e transportá di e barku pa e tereno na Heintje Kool esaki tabata ilegal debí ku e trùknan no ta disponé di niun  pèrmit pa hasi sorto di transportenan asina aki. Tur esakinan tabata e motibu ku a bai pa hasi e control na e kompania. Awor ta di warda riba e pèrmit ya asina por bai abastesé e gasoil na e negoshinan ku esaki ta destiná pe.