Akusado ku a estafá vários persona a apelá su sentensia

117
Nensis a haña diferente víktima pa e kita plaka for di nan.
WILLEMSTAD,– Korte den promé instansia a dikta sentensia den luna di ougùstùs aña pasá den un kaso unda un dama mester a estafá vários persona.

Ta trata aki di Nensis Gijsbertha ku sigur ta konosí pa estafá hende aki na Kòrsou, unda el a keda kondená  pa e echonan aki tambe. Esaki despues ku el a presentá den promé instansia ku su abogado mr. Gomez ku a sali na su defensa durante tratamentu di e kaso.

Den e kaso aki Ministerio Públiko a konta ku fiskal mr. de Groot a ku a pidi kastigu basta haltu. Tur esaki despues ku e sospechoso mester a haña vários persona di nashonalidat haitiano ku e ta dispone di un kas. E akusado aki for añanan 90 ta keda kondená den vários kaso unda e ta estafá su víktimanan, miéntras a bin dilanti den e kaso aki ku nunka e no a paga e víktimanan den pasado bèk.

E akusado den e periodo di desèmber 2017 pa yanüari 2018 mester a estafá vários haitiano ku a keda basta rabiá kuné. Esaki despues ku e akusado tabata gaña e víktimanan ku e tabata disponé di algun kas, unda el a bisa nan ku esaki nan ta na benta. El a tuma sèn di un total di 20 haitiano, unda te awe nan a keda pèrdí di nan plaka.

Un total di 83 mil florin e akusado a estafá e víktimanan, unda vários di nan a presentá ayera na korte, pidiendo daño perhuisio esta nan plaka bèk. Loke sigur a hala atenshon den e kaso aki durante e tratamentu den promé instansia ta e echo ku na aña 2015 el a keda kondená un kaso meskos ku esaki.

Na e okashon aki el a keda kondená na 42 luna di prizòn di kual 12 ta kondishonal ku 3 aña di prueba. Esaki ta pone ku e tabata den tempu di prueba ainda. Ministerio Públiko tabata di opinion ayera ku esaki tambe mester keda ehekutá.

Nensis a bisa wes di promé instansia ku e ta atmití ku el a kometé e echo kastigabel aki atrobe i ku e mester di yudansa. El a splika den sala di korte ku e ta disponé di algun kas pero ainda falta papel ku mester wòrdu reglá, pa e heredá esakinan. El a splika ku e ta pasando malu den prizòn, unda tambe e la bisa ku e ta uzando mashin pa pulmon i no ta kambiando su filternan manera mester ta.

Ministerio Públiko a bai hasi investigashon mas aleu pa wak si en bèrdat e akusado ta pendiente di kas, tereno òf outo i no a logra haña nada. Segun Ministerio Públiko Nensis no ta disponé di niun propiedat tampoko. Segun fiskal di promé instansia ku un biaha mas el a ganja ku e ta disponé di propiedat.

E akusado mes a bisa den promé instansia ku e mashin di pulmon ku ta e disponé di dje, SVB a kaba di bisé ku nan lo no kubri esaki mas pe. Mas aleu el a bisa ku Ministerio Públiko a pidi pa e haña un kastigu miéntras tambe a pidi pa e paga e víktimanan den e kaso aki. Segun e akusado ku esaki ta dòbel kondena.

Segun wes di promé instansia ku nunka den pasado Nensis no a paga niun di e víktimanan ku el a estafá, pues ku awor tampoko kisas lo e no hasi. Nensis a bisa wes ku dòkter a dun’é 6 luna di bida, unda el a presentá ku un karta ku e tabatin esaki skibí na man.

Ministerio Públiko a bisa den promé instansia ku e kaso aki ta hopi grave unda nan a pidi 5 aña di prizòn pe di kual 1 ta kondishonal, miéntras tambe a pidi pa ehekutá un aña di prizòn ku tabatin kologá riba su kabes. Wes a bai di akuerdo ku e petishon aki, unda awor Nensis ta pendiente pa tratamentu di su kaso den apelashon.

Mañan e kaso aki lo ta pro forma.