Dos supuesto outor material di tiroteo di Playa del Carmen detené

64
Sitio unda e tiroteo a keda registrá den fin di siman tras di lomba.

CIUDAD DE MEXICO – Outoridatnan mehikano a sa di detené dos presunto outor material di e tiroteo resien den un bar di e plata turístiko Playa del Carmen, den kua 7 persona a pèrdè nan bida.

Segun a keda indiká, e fiskalia general di estado di Quintana Roo a informá di detenshon di vários personanan, entre nan dos outor material di e 7 homisidionan ku a sosodé den un bar den e munisipio di Solidaridad.

E tiroteo a tuma lugá dia 6 di yanüari último i a keda realisá pa hòmbernan ku a drenta den e lokal algu despues di 8or di anochi i a lòs bala ku armanan di kandela di gran kaliber i despues a sali i hui huntu den un vehíkulo.

E suseso aki ta laga kòrda e tiroteo registrá dia 16 di yanüari di aña 2017 den e diskotèk popular Blue Parrot, ku a laga saldo di seis morto i mas di 15 persona heridá tambe na Playa del Carmen. Esaki durante di un festival di músika elektróniko. Esaki aparentemente debí na un problema entre trafikantenan pa benta di droga.

Diferensia di Blue Parrot, ubiká den e zona di hotèl i di restorantnan, e establesimentu di e último tiroteo tabata den e lokalidat ku mayoriamente ta keda frekuentá pa residentenan, pa e mesun motibu ku no a registrá niun turista heridá òf morto.

Tráfiko di droga ta loke ku ta mustra ku ta e motibu prinsipal di e atake. For di aña 2017 e violensia a subi na un gran parti di e estado di Quintana Roo, kua ta risibí un kantidat importante di turista. Esaki aparentemente pa e problema entre Kartel Jalisco Nueva Generacíon ku Los Zetas i otro gruponan pa kontrol di e region.