Hòmber a kumpra 300 euro di mariwana pa bin Kòrsou kuné

420
Mr. de Groot a pidi kastigu den e kaso aki.
WILLEMSTAD,– Un sospechoso a presentá dilanti wes ayera despues ku e mester a kometé un akto kontra lei.

Tabata 16 di novèmber aña pasá ku e hòmber aki mester a keda gará aki na Kòrsou den poseshon di droga. Riba e dia en kuestion el a kaba di yega for di Hulanda unda el a atmití ku e tabata sa di e droga ku a hañ’é kuné den su poseshon.

El a splika ku el a kumpra e kantidat di droga aki ku ta bal 300 euro pa e por uza. Mas aleu el a bisa ku mirando ku e kantidat di plaka aki lo el a haña ménos droga kuné. Ku esaki e sospechoso kier a trese dilanti ku el a haña e droga mas barata na Hulanda pues pa e motibu aki el a kumpra esaki i bin Kòrsou kuné.

Fiskal a trese dilanti ku e droga aki tabata bon wardá riba e dia en kuestion, unda a bin topa ku esaki  bon skondí den ekipahe di e hòmber. Riba esaki el a kontesta ku el a warda esaki bon pa asina evitá ku nan lo haña e droga i kita esaki for di dje. El a bisa ku e ta atmití ku el a kometé un echo kastigabel i tambe lo para responsabel pa e echo ku el a kometé, esta ku e ta konsiente ku lo e haña un kastigu pa esaki.

Tambe el a atmití ku el a yega di bai Hulanda ku mariwana momentu ku el a biaha pa fakansi, unda el a keda gará na e okashon aki. El a bisa ku e droga aki tabata pa su propio uzo, kual fiskal a trese dilanti ku ta konfirmá ku el a keda detené. Tambe el a trese dilanti ku el a haña un kondena for di aña 2003, unda e tabatin mester di plaka i a bai pasa droga.

Tabata na momentu ku e no tabatin plaka pa kome segun e sospechoso ku el a disidí di bai trata na pasa droga ku el a keda detené. Tambe a bin dilanti den e kaso ku e sospechoso no a sinta su kastigu mesora, esta e aña ku el a keda detené. A bin dilanti ku ta te na aña 2011 el a keda detené na aeropuerto pa e kaso aki, unda a bai kuné pa e sinta esaki.

El a splika ku e motibu prinsipal tabata ku e tempu ei ora nan gara bu ku mes ku un kilo di droga den bo poseshon ta laga bu bai kas. Un punto ku sigur a hala atenshon ta e echo ku e hòmber a bisa ku si e bai será, lo e pèrdè su trabou i ku tambe esaki lo duel su yu nan. El a bisa na yanüari aki lo e mester inisiá ku su trabou i ku e no kier pèrdè esaki.

Fiskal mr. de Groot a trese dilanti ku e sospechoso mester para responsabel pa e akto aki, ounke el a atmití ku e tabatin droga den su poder i kier a biaha pa Kòrsou ku esaki pa propio uzo. El a bisa ku droga ta kousa di mayoria kaso di likidashon aki na Kòrsou i ku mester kastig’é pa nos komunidat ta na altura ku tin kastigu serio pa e kasonan aki.

El a bisa ku den e tipo di kasonan aki sa pidi kastigu di trabou, unda tambe lo tene kuenta ku situashon personal di e sospechoso. El a pidi un kastigu di 180 ora di trabou di kual 90 ta kondishonal ku 2 aña di prueba. Wes mr. Gruijters na su turno a bisa ku e ta haña e petishon di fiskal ta kuadra, unda el a honra esaki. Tambe el a bisa e hòmber ku e tin 14 dia pa apelá e sentensia si e no ta di akuerdo ku esaki.