Hòmber kastigá pa droga i arma dilanti 3 wes

378
Hòmber kastigá pa droga i arma dilanti 3 wes
WILLEMSTAD,– Mañan korte di apelashon lo trata diferente kaso unda akusadonan a apelá sentensia di promé instansia.

E hòmber Janeri Recio lo ta dilanti wesnan di korte di apelashon pa tratamentu di su kaso, unda el a haña un kastigu basta serio serka wes di promé instansia. Esaki despues ku e mester tabata manehá un vehíkulo ku tabatin ilegal, arma i tambe droga aden.

Ta trata aki di un kaso ku a tuma lugá 18 di ougùstùs 2017, unda polisnan mester a haña un yamada ku un lancha mester a yega na kosta di St Joris. Tabata na e okashon aki ku a dirigí patruya pa e sitio unda por a nota ku un outo tabata bin di direkshon di e laman.

Tabata na momentu ku e polisnan a topa ku e outo indiká, ku a duna e  hòmber Recio òrdu pa para pero e no a duna oido na polis riba e dia en kuestion. . Tabata aki ku e shofùr mester a hisa velosidat, unda el a intentá na kore bai laga polis. Despues ku polis a sigui persiguí e outo ku no tabatin intenshon di para, e akusado Recio huntu ku algun hende mas den outo mester a aksidentá, unda nan a dal den un muraya riba Kaminda Mitologia.

Aña pasá den luna di mei a trata e kaso aki den su kontenido unda e akusado Recio a trese dilanti, ku e tabata drumi riba su kama unda a pidié un fabor. El a bisa ku esaki tabata despues ku el a haña un yamada di Sandy. Ku Sandy e akusado Recio ta referí na Romer Aguasiva ku a pèrdè su bida despues di impaktonan ku el a risibí di e aksidente.

Despues ku e akusado a kue su telefòn el a skucha kon Sandy ta pidié un yudansa, unda el a bisa ku normalmente e ta barbero, pero kos tabata ketu i el a bai di akuerdo pa e haña 25 florin di gasolin. El a haña òrdu pa buska frei di Sandy i tambe 2 prima mas ku mester a yega kosta 18 di ougùstùs aña pasá.

Segun e akusado ku el a laga un mensahe pa su frei miéntras tambe el a bisa su mama riba e dia en kuestion ku e ta bai yuda Sandy bin. El a trese dilanti durante e tratamentu den promé instansia ku el a bai ku intenshon di buska Sandy na e sitio i a yega topa ku algun persona mas.

El a bisa ku e la asta diskutí ku Sandy mirando ku esaki no tabata e plan segun su vershon, unda despues e mester a sali for di e sitio ku un total di 6 persona, kual mesora polis a kuminsá persiguí nan. Tabata aki ku un persona den e vehíkulo a bisa e shofùr para unda Sandy mester a bisé pa e sigui kore, unda el a hisa velosidat ku e konsekuensia menshoná unda 3 persona a pèrdè nan bida. Tabata Romer ‘Sandy’ Aguasiva, Lozada Chiquito i Wueman Ibarra ku a bin pèrdè nan bida a konsekuensia di e aksidente.

Riba e dia en kuestion e sospechoso tabata manehá un Honda CRV, unda tabatin 20 arma di kandela den e outo i un kantidat di 10640 gram di mariwana. El a bisa ku e no tabata sa ku ta trata aki di kosnan ilegal i ku e la bai yuda Sandy riba e dia en kuestion i hañ’é den tur e kosnan aki.

Den promé instansia el a haña un kastigu di 6 aña riba petishon di Ministerio Públiko, ku a asta a bisa di a tene kuenta kuné pasó e ta den ròlstul. El a apelá su sentensia, miéntras awor e ta pendiente pa tratamentu di su kaso ku ta mañan mainta mitar di 10 di mainta.