Hòmber ku a kaba di atraká turista arestá

Nèt na e entrada di Plantashi Sanikolas

296
Willemstad—–Djaweps 10 di yanüari 2019, alrededor di 13.49 or, Sentral di Polis a risibí notifikashon di un kaso di ladronisia ku violensia ku a tuma lugá na entrada di Plantashi Sanikolas.

Na yegada di e patruya a topa ku un hòmber ku a konta polis ku un hòmber sospechoso a sorprendé ku arma di kandela, menas’é i kita tur su pertinensianan. Despues di su akto, e sospechoso a hui bai na pia.

Kontinuando ku un búskeda den e área, polis a logra detené e hòmber S.F.V.M., 41 aña di edat, nasé na Kòrsou, pa e kaso di ladronisia i violensia ariba menshoná.

Durante di un kontròl riba e sospechoso, no a topa ku e arma di kandela pero si a haña un bala skèrpi i un poko mariwana, ku a keda konfiská.

A presentá e sospechoso dilanti di un Fiskal Ouksiliar ku a ordená su enkarselamentu pendiente di mas investigashon.