Levante ta komandá serie kontra FC Barcelona den Copa Rey

68
Fot golazoo: Golaso di kabes di Eric Cabaco ta manda Levante dilanti ku skor di 1-0. Jasper Cillessen no tabatin niun klase di chèns.

VALENCIA, – Despues dje resultado di ayera mester apuntá ku e oktavo final den  Copa  Rey  a kompliká un poko pa Barça, porsierto ku tabata poko inspirá.

Un gol di pinalti anotá pa  Coutinho den final dje partido a duna e ekipo di Barcelona tòg speransa pa ora nan hunga otro siman na kas.

E skor final dje partido 2-1 na fabor dje ekipo di  Levante, porsierto ku faltando sinku minüt pa final dje partido tabata dilanti 2-0.

Tabata un kalvario e desishon dje rotashon di e mister Ernesto Valverde den e Ciutat di València, kontra di un Levante dje mister Paco López  ku tambe a kambia algun hungadó.

Pero mester apuntá ku ekipo di Levante a pone mas gana ku e barcelonistanan, miéntras ku na momentunan aki ta ekipo ku ta manda den e eliminatorio te ora nan hunga otro siman e partido di buèlta den Camp Nou.

Barcelona den partido di ayera a hunga sin vários hungadó estelar manera Lionel Messi, Luis Suarez, Ivan Rakitic, Marc Ter Stegen i Jordy Alba entre otro.