Segun hòmber mester legalisá kokaina

535
Wes mr. de Gruijters a keda basta sorprendé pa manera di pensa di e sospechoso.
WILLEMSTAD,–E hòmber R. de R. tabata dilanti wes ayera pa un kaso basta grave ku tabatin kontra di dje.

El a presentá sin abogado pa tratamentu di su kaso unda mester a hañ’é ku droga den su poseshon 11 di novèmber aña pasá. Esaki despues ku e kier a biaha pa eksterior unda el a keda gará ku e droga aki den su poseshon.

E kaso aki sigur a hala atenshon mirando e pensamentu ku e mula tabatin ora el a haña su chèns di papia den sala di korte. Tabata un kaso unda a logra gar’é ku un kantidat di 1000 gram di kokaina den su poder. El a bisa ku e tabata sa ku e tin droga den su poder i ku ta e mes a pone esaki. El a bisa ku e ta haña mester legalisá droga aki na Kòrsou.

Mas aleu el a trese dilanti ku por hasi negoshi ku droga nèchi i ku no mester di uza arma di kandela pa interkambio di droga i sèn. Loke tambe sigur tabata remarkabel, ta e echo ku el a bisa ku e sa ku lo e haña un kastigu, kual tambe el a bisa ku e ta di akuerdo ku e mester haña un kastigu. El a splika ku mester legalisá e droganan aki pa asina mira ku e esaki tambe por drai nèchi.

E sospechoso a bisa ku e ta un komersiante ku ta produsí droga i ku lo e la bende e droga ku e tabatin den su poseshon. Wes mr. de Gruijters a bisa e  sospechoso ku e kaso aki ta unu hopi apart mirando e historia ku e mula aki a bin kuné durante tratamentu di su kaso.