TAMBU na Museo di tambú Shon Cola

232
Willemstad—–Djadumingu awor 13 di yanüari 2019 di 5’or pa 11’or pm, grandioso tambú di Dumingu di Tres Rei na Museo di Tambú Shon Cola na Sabana Baka 31. Animashon musikal ta na enkargo di Zoyoyo i su Grupo ku Mistica Stefania i Grupo Trankilo Klásiko ku hóbennan dinámiko di Zjaro.

E aña akí Museo di Tambú Shon Cola ta duna atenshon spesial na dos tambulero hóben ku a bandoná e mundu aki tempran. Nan ta Evert Anastacio Zinck di e bario Fùik i Aichelo Jonatan ‘Kwichi’ Maria di e bario Zjaro.

Dumingu di Tres Rei ta un dia masha spesial den tradishon di tambú na Kòrsou. Den e promé mitar di siglo pasá hendenan di Bándariba tabata kore paranda di tambú den trùk di palu bai Bándabou for di mainta tempran i tabata regresá atardi pa sigui ku e paranda den nan propio bario te 12’or djanochi. Di e forma ei nan tabata selebrá tambú di Dumingu di Tres Rei i terminá e temporada di tambú.

Den e temporada akí tambú di Bándariba tabata tuma lugá na kas di hende. Por kòrda tambúnan na kas di Mosa na Roi Indjan, Enda, Polin Bòn Bòn, Mosa di Janbos, Mario di Juan di Nene, Ursulita, Graciëla, Maria Daal, Chencha, Klup Santa Rosa, Bin Bo Bul’aden, Kobitu, Famia Pichon, Via di Yandi, Fincho Nanoy, Atala, Tan Sera, Strea den palu, Famia Josephina, Chè di Zjaro, Bar di Monrepos i hopi mas.

Djadumingu awor dia 13 di yanüari ta kontinuá ku e tradishon na Museo di Tambú Shon Cola. Tambú di Dumingu di Tres Rei ku Zoyoyo i su Grupo ku Mistica Stefania i Grupo Trankilo Klásiko ku hóbennan dinámiko di Zjaro.

Bo ta gusta mira, balia, skucha, kanta i toka tambú? Bo ta gusta e dushi ambiente di un bon barí? Awèl bo ta kordialmente invitá. Tur amante di tambú i amantenan di kultura di Kòrsou ta bon biní serka René na Museo di Tambú Shon Cola. Entrada ta grátis.

Tela tambe lo tei pa busk’e webu pèrdí.