20 aña pa asesinato ruman testigu

123
Shurandy S (40) den korte
AMSTERDAM—Korte na Amsterdam a sentensiá Shurandy S (40) na 20 aña kastigu pa asesinato di ruman di un testigu prinsipal.

E víktima a keda asesiná pasobra su ruman, Nabil B, a testigua kontra un grupo di kriminalnan, segun OM. Segun korte Shurandy S a ehekutá e likidashon di Redouan B na Amsterdam-Noord riba instrukshon. El a haña mandato pa e likidashon delantá. Shurandy ta ninga di menshona ken a pag’e. El a atmití e asesinato pero ta bisa ku e no tabata sa ken e víktima ta. Korte no ta mira motibu pa konkluí ku S tabata sa ku ta trata di ruman di un testigu. Esaki no a pisa den e kastigu. Ademas el a mustra duele di loke el a hasi i ta sinti su mes kulpabel. OM a pidi 28 aña kastigu pa Shurandy S. i ta apela e kaso. Tantu korte komo OM a bisa ku asesinato di famia di un testigu importante ta algu nobo na Hulanda. Segun korte e asesinato mester a spanta Nabil B i posibel otro testigunan. Na 2017 e testigu a hasi deklarashonnan na polis tokante un kantidat di likidashonnan. E mes tabata envolví den un dje likidashonnan pero a haña remordimentu pasobra a mata hende robes. Dor di e fayo e tabata teme pa su bida i a bai polis. El a papia di e fugitive kriminal Ridouan T ku a keda vincula ku 12 likidashon. OM ta kere ku e grupo aki a duna instrukshon pa mata ruma dje testigu.