Hòmber armá tin personanan komo rehen den pelukeria na Montevideo

98
Outoridatnan ku ta rondó di e pelukeria.

MONTEVIDEO – Un hòmber armá a bira di kabes den oranan di ayera tardi den un pelukeria na e bario sentriko di Pocitos di Montevideo i ta mantené un number ainda no divulgá, di rehen. Esaki aunke ku dos muhé i un menor di edat si a sa di hui.

E echo a kuminsá na alrededor di 2or di atardi i testigunan a afirmá di a skucha vários zonido di bala.

Un negoshadó di Ministerio di Interior ta na e sitio, meskos ku famia di e hòmber responsabel di e sekuestro aki, kende ta yudando outoridatnan den e intento pa e entregá su mes.

Segun a keda konfirmá pa fuentenan di Ministerio di Interior, e hòmber lo a bira di kabes den e lokal pa motibu ku su eks pareha, kende aparentemente ta traha na e sitio aki, lo a traishoná ku un otro hòmber.

Bosero polisial di Montevideo, di su banda a indiká na medionan di komunikashon ku e situashon ta unu kritiko i a pidi esaki nan pa alehá un tiki for di e lokal, pues nan lo por stroba òf kisas perhudiká e negosiashonnan.

Un video ku ta sirkulá riba retnan sosial, kua aparentemente a keda grabá i kompartí pa e supuesto sekuestrador via di su kuenta personal di Facebook, ta mustra e rehennan tirá na suela den e pelukeria, inkluyendo su eks pareha.

Riba e imágennan aki, e hòmber ta atribuí kulpa di loke a sosodé na e muhé pa motibu ku esaki a gan’é. Esaki ademas ta menasá ku mata tur e personanan den e establesimentu.

Outoridatnan sinembargo no a konfirmá identidat di e kriminal i tampoko si e video aki ta unu outéntiko òf no.