579 arma di kandela lokalisá na Repúblika Dominikana

85
Ta diferente tipo di arma i bala a keda hañá.

SANTO DOMINGO – Un total di 579 arma di kandela i 335 mil 259 munishon di diferente kaliber a keda hañá den e último dos añanan i mei, den operativo nan realisá pa e Direkshon di Inteligensia di Estado Mayor Conhunto, na e puertonan marino i aeropuertonan.

Segun medionan di komunikashon di e pais, e informe estadistiko ta señalá ku durante di e luna di novèmber di aña 2018, a produsí un di e kantidatnan mas relevante na puerto di Haina, di e provinsia di San Cristobal. Durante di e operativo aki a haña un total di 15 arma di kandela di marka P-80 kaliber nuebe milimeter.

Konforme datonan estadistiko, e armanan di kandela i munishonnan a yega na e pais prosedente di Estádos Unídos, skondé di diferente forma. Esaki den intento di hinka esaki nan den forma di kontrabanda. Trafikantenan di arma di kandela i munishon ta hasi uso di kompanianan di manda alimento i paña pa asina intentá di introdusí esaki na e pais.

Den e kontrolnan, realisá pa agentenan durante e periodo aki, a haña ademas 80 mil 022 bala di pistol 9 milimeter i 16 mil kartucha di kaliber di 12 milimeter. Un total di 95 arma di kandela di diferente kaliber tambe a keda hañá, huntu ku otro tiponan.

Miéntras, ku na aña 2017 a produsí e hayasgo di 212 arma di kandela i un kantidat di 85 mil 828 bala di diferente kaliber. De e periodo di ougùstùs di aña 2016 pa desèmber di e mesun aña aki, a haña 272 arma klandestino.