Elim “MrMèlo”Ignatia ku piesa nobo riba merkado

126
Su piesa nobo tin tur kos pa bira un hit grandi den 2019.

WILLEMSTAD,—-Den un kombinashon di kompositor forma pa dos hóben músiko Elim “MrMèlo” Ignatia i Rushenty “Nsty Pash” Pastor nan a perkurá pa pone un piesa nobo riba merkado, mester bisa ku e piesa ta keda kanta pa “MrMèl” i e mes ta esun ku a areglá e piesa.

T’asina ku e piesa ku su titulo ta “Regalo di Amor”, ta un idea ku a nanse for di aña 2011 tempu ku “MrMèlo” a funda agrupashon musikal Melodies, tabata e tempu ei ku “MrMèlo” i “Nsty Pash” huntu a komponé e piesa ariba menshoná.

Pero nan a laga esaki drumi trankil den kashi, awor e dou ariba menshoná a bai den nan kashi i asina drenta studio di grabashon pa ku e mes un piesa ku nan a komponé huntu 8 aña tras di lomba. ‘E Mulina’, a haña e oportunidat pa skucha e piesa kanta pa “MrMèlo” i nos tin ku bisa ku ta trata aki di un komposishon ku ta hopi riku na letra i ku tin tur kos pa bira un hit grandi den 2019.

Tambe nos tin informashon ku e hóben “MrMèlo” su deseo ta pa pronto habri su mes un label bou di e nòmber “FLAVOR”, i asina kuminsá produsí pa su mes i tambe pa otro artista nan ku ta interesá den su servisio. No tin duda ku “MrMèlo” ta bai logra su soño pa pronto e lo bai tin su mes un Label pa asina duna otro hóben nan tambe e chèns pa bira artista den nos farándula lokal.