Jill Frans den Tumba ku komposishon i areglo di Gregory Colina

161
Tene hopi kuenta ku e kantante aki den Tumba 2019

WILLEMSTAD,—-Na aña 1996 Jill Frans a hasi su debut den festival di Tumba, e la hasi esaki ku un komposishon di Gilbert Sparen i e la keda kompaña pa agrupashon musikal Orkesta Dulsura.

Mester bisa ku for di e tempu ei Jill Frans a hala atenshon di hopi kompositor i tambe areglista, paso e la impreshoná tur hende ku su stèm i e manera ku e la presentá su Tumba na aña 1996. Esaki a habri wowo di diferente kompositor i areglista.

Jill Frans a partisipá den Festival di Tumba ku diferente kompositor, paso di bèrdat ta tur kompositor ke traha ku e gran kantante aki. Pa loke ta trata e aña aki pa ku su partisipashon den Festival di Tumba Jill Frans ta bai partisipá ku komposishon i areglo di e maestro Gregory Colina.

Sigur mester wak e kombinashon aki tambe ku wowo nan di falki, paso ta trata aki di un kombinashon ku por hisa Curaçao Festival Center dal abou. Di informashon ku nos ta disponé di dje ta ku na e momentu nan aki tin kuater agrupashon musikal ku Jill Frans tin ku bai skohe ku kua di nan e ta bai partisipá kuné, otro siman e desishon ta bira konosí.

.