Tres morto registrá den fuerte inundashonnan na Argentina

58
Vehíkulonan ku ta keda pegá den lodo i inundashonnan registrá na Argentina.

BUENOS AIRES – E inundashonnan registrá for di djamars último na Argentina, debí na fuerte yobida den e provinsia nan na nort i nortost di e pais, a laga saldo di tres morto i un total di 1.935 persona ku mester a keda evakuá.

Un mama i su yu muhé a pèrdè nan bida den nan bibienda, na e kapital Chaco, na momentu ku nan a keda lastrá pa fuerte koriente di e riu miéntras ku nan tabata den un vehíkulo. Esaki miéntras ku un otro hòmber a fayesé despues di keda alkansá pa un welek den e provinsia di Santiago del Estero.

E provinsianan di Santa Fe, Entre Rios, Chaco, Corrientes, Formosa i Tucuman a keda komo esnan mas afektá pa e fuerte bientu i intenso kaida di awa, karakterístikanan di e temporada aki den e region.

Konkretamente, na nort di Sante Fe, a akumulá for di djamars último, un total di 0.8 liter di yobida pa meter kuadrá, miéntras ku na Chaco, Corrientes i Entre Rios, a registrá 0.5 liter.

Aktualmente, e gobièrnu argentino ta traha konhuntamente ku Krus Kòrá i otro organisashonnan pa asina duna yudansa na víktimanan di inundashonnan i restablesé e servisionan habitual den e zonanan afektá.

Otro di e problemanan prinsipal di e inundashonnan ta e kantidat di animalnan peligroso manera entre otro kolebra ku e awa ta lastra den núkleo di e poblashonnan.

Esaki no ta algu straño i tampoko deskonosí na e pais, sigur tumando na kuenta ku e pais ta pasando den su temporada, konosí, ku hopi yobida i konsekuentemente inundashonnan ku ta keda registrá pa e motibu aki.

Segun outoridatnan di Cuba, esaki sigur ta algu ku por a keda sperá, ya ku e situashon e aña aki, kompará ku otro añanan, pa ku e kantidat di yobida ta otro. Esaki sigur no e pais so pero na hopi otro mas.