Venezuela ta denunsiá atake terorista kontra edifisio di seguro

59
Sitio ku a pega na kandela i kima por kompletu.

CARACAS – E gobièrnu di Venezuela a denunsiá den oranan di ayera, un atake terorista kometé kontra edifisio di e Instituto Venezolano di Seguro Sosial, ubiká den e lokalidat di Guarenas, na e estado sentral di Miranda.

E visepresidente sektoral pa Sosialismo Sosial i Teritorial di Venezuela, Aristobulo Isturiz, a splika ku tabata trata aki di un kandela ku lo mester a keda di un òf otro forma provoká.

E kandela aki a afektá 22 mil meter kuadrá, unda tabata seis parti di e edifisio ku ta pertenesé na e seguro, dos di nan a keda komo pèrdida total.

Esaki a keda katalogá komo un akto simplemente inkreibel i kontra e pueblo. Esaki ta e mayor akto kriminal kontra salú di Venezuela, den henter su historia, e hòmber a menshoná.
Segun Isturiz, e atake aki a keda realisá den oranan di djaweps último, na e mesun momentu ku e mandatario Nicolas Maduro, tabata huramentá komo presidente di un periodo nobo.

Na e sitio tabatin material pa ekipá tres sentro di salú nobo na e pais, inkluyendo tratamentu i unidatnan pa diálisis, sufisiente pa atendé masoménos 10.080 pashènt, 16 ekipo pa hasi tèstnan, 14 mashin di anestesia, 54 sistema di ventilashon, tomografia i unidatnan di resusitashon pa resien nasí.

Tambe a pèrdè un hospital di kampaña, ku sala di operashon i terapia intensivo. Segun e funshonario, a hasi uso di 4 mion di liter di awa pa asina logra paga e kandela aki, den labornan ku a keda ekstendé te den oranan lat di djaweps mardugá.