Grupo di kubano ta denunsiá violashon di nan derechinan

52
E kubanonan a bai protestá dilanti di e Sentro di Detenshon di Inmigrashon di e isla.

CAYMAN ISLAND – Un grupo di siudadano kubano ku a yega na luna di sèptèmber último na Cayman Island, a denunsiá e supuesto violashon di derechinan humano ku nan ta indiká di ta sufri di parti e gobièrnu.

Serka di un desena di kubano a bai protestá dilanti di e Sentro di Detenshon di Inmigrashon di George Town, kapital na ost di e teritorio britániko, kua ta dependiente di Estádos Unídos i situá na nortost di Jamaica. Esaki pa di e forma aki denunsiá nan situashon.

E kubanonan tabata kana ku algun pankarta ku ‘slogan’ di ku nan no ta inmigrante, pero refugiado i ku nan ke un proseso hustu.

Un di e kubanonan a señalá na medionan di komunikashon ku e protesta aki ta pa trata di yama atenshon relashoná u kon e gobièrnu ta manehá e solisitutnan di asilo.

Esaki a sigui indiká ku te ainda nuebe di nan a solisitá asilo i di esaki nan ocho a keda rechasá.

E siudadano kubano a sigurá na outoridatnan di e pais, ku no a splik’e di un forma adekuá su derechinan legal i no a risibí un kontesta korekto pa ku su petishon di asilo.
E siudadanonan kubano a denunsiá ademas na medionan di komunikashon, relashoná ku nan preokupashon relashoná ku e posibilidat di por keda mandá bèk pa nan pais di orígen, komo represaya.

E protesta dilanti di e Sentro di Detenshon di Inmigrashon ta e segundo ku ta keda realisá den e último seis lunanan.

Na luna di yüli último, un grupo di kubano a inisiá un wèlga di hamber komo respuesta di nan detenshon, kua a keda prolongá, na e Sentro di Detenshon di Inmigrashon.

Sinku hòmber di e sentro ainda ta permanesé detené pa mas di 2 aña i seis otro ta pasando un aña.

Den e fechanan aki, vários di esnan liberá pa e sentro di detenshon i bou di supervishon di outoridatnan, miéntras ku ta konsiderá na solisitut nan di asilo. Esaki aunke ku algun a keda birá bèk debí na problemanan pa haña un bibienda.

E gobièrnu lokal te ainda no a pronunsiá nan mes ofisialmente relashoná ku e protestanan aki.