Kolombiano akusá di narkotráfiko a keda ekstraditá pa Estádos Unídos

62
E hòmber a keda ekstraditá di Colombia pa Estádos Unídos.

BOGOTA – Outoridatnan kolombiano a ekstraditá, rumbo Estádos Unídos, e hòmber Horacio de Jesus Triana Romero, konosí komo El Patron de las Esmeraldas. Esaki a keda señalá pa korte di e pais pa delitunan di narkotráfiko.

Romero a keda kapturá pa outoridatnan kolombiano den un operashon na luna di aprel di aña 2016 i a keda kondená un total di dies aña i un luna di prizòn na su pais. Esaki pa e delitunan di fabrikashon, tráfiko i porte di arma di kandela i tentativa di homisidio.

Segun e investigashonnan, e hòmber ta e presunto responsabel di distribushon di al ménos sinku kilo di kokaina ku tabata warda pa por keda mandá pa Estádos Unídos.

Ademas, Romero a keda akusá tambe di ta forma parti di un banda kriminal di droga ku ta operá den e departamento di Boyacá, unda ta kultivá i prosesá e droga pa manda esaki di Colombia, pa México, Haiti i otro rutanan alternativo via di Venezuela pa posteriormente keda eksportá i distribuí na Estádos Unídos.

E grupo kriminal di kua e hòmber aki tabata forma parti, tabata keda liderá pa Pedro Nel Rincon, konosí komo ‘Pedro Orejas’, kende a keda ekstraditá na ougùstùs último pa Estádos Unídos. Esaki tambe pa delitu di narkotráfiko.

Promé ku el a keda ekstraditá, Pedro, tabata kumpli ku un kastigu di 27 aña di prizòn den e sentro di detenshon di Picaleno, na e siudat di Ibagué.