Pastor akusá di laga amante fayesé pa asina skonde e relashon

90
E pastor mester pa deklará den e siman aki.

BUENOS AIRES – Carlos Scarlata, un pastor argentino, a keda akusá di laga su amante fayesé pa asina niun hende no haña sa di nan relashon. Aparentemente, e muhé a sufri un deskompensashon pa kousa di diabétis ku ta padesé di dje miéntras e tabata den kas ku e pastor, kende na su turno a sali bai sin solisitá yudansa.

E kaso aki a keda registrá den e provinsia di Mendoza, Argentina. segun informashonnan divulgá pa medionan di komunikashon di e pais.

E kurpa di e víktima, identifiká komo Valeria Cornejo, a keda hañá den estado di deskomposishon na luna di Òktober i a determiná ku e morto aki tabata debí na kousanan natural. Sinembargo, e denunsia di un amiga di esaki, kende e pastor aparentemente a konta loke ku a sosodé, a habri e kaso aki bèk.

Di e forma aki e religioso a keda sitá pa Hustisia pa asina e por duna su deklarashonnan den oranan di e siman aki, komo ku e tabata e último persona ku tabatin kontakto ku e víktima i sugiriendo ku apesar di presensiá e problema di salú di e muhé, no a pidi yudansa pa asina su aktuashonnan no bira konosí.

Scarlata a kometé e delitu konosé komo ‘omishon di ousilio’ i lo por enfrentá entre sinku i 15 aña di prizòn. Ademas di e medidanan ku por keda tumá den su kontra, mirando su posishon religioso.

E sikiatra ku a atené e víktima tambe a konfirmá e supuesto vínkulo amoroso ku tabata eksistí entre su pashènt i e pastor, ya ku Cornejo tabata asistiendo na terapia presisamente, konsiderando ku e tabatin un relashon prohibí i ku e ta un muhé profundamente religioso.

Esaki no ta e promé biaha ku e pastor ta hañ’é involukrá den algu, na aña 2016 el a keda konosí pa motibu ku el a pone sierto eksigensianan pa forma bisti di hende muhé pa por drenta e misa. Esaki a prohibí uso di saya, karson pèrtá òf blusanan fini, entre otro. Esaki pa motibu ku e ta konsiderá ku e muhénan ta provoká e hòmbernan di e forma aki.