Rasta Le ku ICONS BY GIO den festival di Tumba 2019

279
E ta den Tumba 2019 ku agrupashon musikal ICONS BY GIO.

WILLEMSTAD,—-Na mas ku un okashon ‘E Mulina’, a bin ta bisa ku Festival di Tumba 2019 lo bai ta karga ku sorpresa. Di informashon ku a drenta na mesa di redakshon di ‘E Mulina’, ta bisa ku e super popular kantante Leandry “Rasta Le” Gonzales ta bai partisipá ku agrupashon musikal ICONS BY GIO den festival di Tumba 2019.

T’asina ku ya no ta un sekreto ku agrupashon musikal Orkesta Vega no ta partisipá e aña aki den Tumba 29, pero e kantante “Rasta Le” si su intenshon ta hopi grandi pa partisipá den festival di Tumba, esaki a pone ku gerente di ICONS BY GIO mes ora a aktivá riba e kantante ariba menshoná.

Di informashon ku nos a hana serka di nos fuente a bisa nos ku “Rasta Le” ta bai partisipá 100% ku ICONS BY GIO i e ta bai hasi esaki ku un komposishon di su ruman hòmber Gilbert “Gibi” Doran, esaki ta nifiká mes ora ku e dos ruman nan a benta tur pasado un banda i asina fiha un futuro nobo nan dilanti.

Ku presensia di “Rasta Le” ku ICONS BY GIO den festival di Tumba, esaki sin duda ta hasi ku awor e kos ta bai bira mas interesante, paso ICONS ya tin dos kantante hopi peligroso ku ta Amos Balentin i Djuric “DjuDju-V” Virginie, ámbos ya a bisti e korona kaba, Amos Balentin na tres okashon i “DjuDju-V” na un okashon, i awor nan ta bai konta ku otro kantante ku sin duda mester tene hopi kuenta kuné den Tumba 49, paso ta trata aki di un kantante ku por bulto e lugá sin duda.