Vesta i Centro Barber ku triunfo

95
Akshon durante di e wega entre Jong Colombia i Vesta.
WILLEMSTAD—E kampionato di futbòl FFK, pa loke ta promé divishon a sigui ku 2 wega ku a mira akshon, durante di e fin di siman ku ta tras di lomba, riba djasabra na Stadion Antoine Maduro na Kintjan.

Vesta vs Jong Colombia

Den e promé wega di anochi, tabata e ekipo di Sta Maria i bisindario Vesta, ku ta logra 3 punto mas, derotando e sotaneronan, e ekipo saminero di Jong Colombia ku skor di 3-1. Esaki despues ku tabata e ekipo di bario di Boka Samí i bisindario, ku a pika dilanti i e parti inisial di wega a transkurí ku e ekiponan empatá na 1 gol.

Jean Carlo Torbed a duna Jong Colombia bentaha na minüt 28, pa seguidamente na minüt 36, Ruchendro Kierindongo sòru pa e empate. Den e parti komplementario tabata Ethelbert Daal, ku ta duna Vesta bentaha na minüt 71, pa finalmente Ruchendro Kierindongo seya e triunfo for di un tiru penal den pitu, asina anotando su di 2 gol di wega.

Centro Barber vs Victory Boys

Seguidamente tabata e ekiponan di Centro Barber i Victory Boys ku a enfrentá otro. Den un wega unda ámbos ekipo a lucha tenas pa e triunfo, tabata Centro Barber ku ta optené e 3 puntonan, kibrando nan racha negativo di 3 derota sigui. Un ke otro ganadó e ekipo di Sapaté i bisindario, ku skor di 2-0. E parti inisial a tèrminá sin gol i tabata Naigel Valorian, kende for di un tiru liber na di 72 minüt di wega ta duna Barber bentaha, pa seguidamente den minütnan final di partido, Sandy Cijntje anotá pa seya e triunfo di 2-0.