Watakeli ta gana pèrtá di Hurricane

143
Akshon den e wega entre Watakeli i Hurricane.
WILLEMSTAD—E Kampionato di vòlibòl organisá pa FeVoKo, ku ta dediká na ‘Dito’ Ravenstein, a kontinuá ayera, unda ku tabatin 4 wega riba kancha di Sala Errol Rooi na SDK.

Femenino

Shuatanari no a duna Green Jewels niun espasio i ta gana den 3 sèt ku parsialnan di 25-16, 25-7 i 25-8. Di e forma aki Shuatanari ta aserká Hurricane, ku ta na di 2 lugá riba e tabla di posishon.

E di dos wega di klase femenino superior di ayera a bai entre Hurricane i Watakeli. Watakeli ta sali gana e promé set 25-18 i e di dos sèt 26-24.

Hurricane ta bòns bèk i bai ku e di 3 i di 4 sèt, ku skornan di 25-15 i 25-8, pa asina forsa e sèt desisivo.

Den e sèt final aki, e bataya tabata un kos serio, pero tabata Watakeli ku ta sali viktorioso, ganando 15-11.

Maskulino

Den e sekshon maskulino Klase A, Watakeli ta derotá Green Tigers 2-1 (23-25, 25-11 i 25-10).

Miéntras ku den klase maskulino superior, Titus a duna Stakamahachi hopi molèster, pero ‘Staka’ a kombiná eksperiensha ku e energia di esnan mas hóben, pa derotá Titus 3-1, ku parsial di 25-19, 16-25, 33-31 i 25-15.