Dos morto registrá den sentro médiko despues di pèrdida di koriente

109
Sentro médiko unda dos persona a bin fayesé den fin di siman.

CARACAS – Un total di dos persona a pèrdè nan bida despues di un korte eléktriko ku a afektá e hospital klíniko universitario di Caracas, un di esnan mas importante di e kapital venezolano.

E fayo di e servisio a kuminsá den oranan di djasabra anochi i a keda prolongá pa kasi for ora, kousando e fayesementu di os pashènt ku tabata rekluí den sala di kuido intensivo i tabata risibí yudansa di mashin pa por hala rosea.

E trahadónan di e sentro médiko a indiká na medionan di komunikashon venezolano ku e plantanan di respaldo no ta operativo for di algun luna kaba i ku nan no a keda remplasá aunke ku a alertá di e echo aki.

Miéntras tantu e minister di Energia Eléktriko di Venezuela, Luis Motta Dominguez, a denunsiá un presunto sabotahe den e sistema ku ta proveé servisio na e sentro sanitario, loke el a kalifiká ademas komo un echo intolerabel.

Esaki a sigui indiká ku e personanan ku a kometé e echo aki ta personanan ku no tin interes pa bida di otronan. Esnan ku ta asistí na e sentronan médiko aki ta personanan di ménos rekurso i esaki ta un akto di hopi sin kurason.

Kortenan eléktriko ta algu frekuente na Venezuela, un pais ku ta pasa den krísis ekonómiko ku ta ekspresá su mes den skarsedat generalisá, fayonan frekuente den prestashon di servisionan públiko i hopi mas.

E gobièrnu di Nicolas Maduro tin kustumber di tira falta di supuesto sabotahenan i di un guera eléktriko na opositornan, pero opositornan i ekspertonan di e materia ta indiká ku esaki lo tin un otro kousa prinsipal.