Un morto registrá despues ku helikòpter polisial ta kai na Rio de Janeiro

85
Forma ku e helikòpter a keda despues di a aksidentá den awa.

RIO DE JANEIRO – Un polis militarisá a pèrdè su bida i otro mas a resultá heridá na momentu ku un helikòpter den kua nan tabata biaha a kai den awanan di Bahía de Guanabara, situá na e zona nort di e siudat di Rio de Janeiro.

E aksidente a tuma lugá den oranan di djaluna mainta, na momentu ku e helikòpter ‘Fénix 08’ a haña su mes obligá na realisá un aterisahe forsoso den awa, miéntras e tabata bula riba e region.

E agentenan tabata patruyá for di den laira riba e konosido sitio di ‘Linha Vermelha’, un via ku èksprès ku ta uni Rio ku e zona metropolitano.

Despues di e impakto, e bomberonan ku a presentá na e sitio a sa di reskatá e kuater tripulantenan di e aparato, algun di kua mester a keda someté na un reanimashon pulmonar.

E kuater viktimanan a keda trasladá pa e sentro médiko militarisá, pero un di esakinan, kende a keda identifiká komo Felipe Marques de Queiroz, di 37 aña, a pèrdè su bida poko despues.

E otro tres agentenan polisial ta for di peliger.

Segun a keda indiká, e helikòpter tabata den kondishonnan perfekto di por bula i tabata keda mantené i kontrolá segun reglanan ta indiká. Outoridatnan brasilero di tur forma a habri un investigashon den e kaso aki, pa asina sa sigur kiko tabata motibunan di e aksidente.