Mama ku a torturá su dos yu muhé chikí durante añanan kondená na Colombia

58
Muhé detené den e kaso aki i kende a pèrdè kustodia di ámbos yu muhénan.

BOGOTA – Un kaso di maltrato infantil a konmoshoná Colombia den e último dianan tras di lomba. E notisia di dos mucha muhé, di 9 i 12 aña, kende nan tabata keda kruelmente torturá i sikologikamente maltratá pa nan propio mama, si nan no kumpli ku tur e òrdunan di esaki, a generá un rechaso den e komunidat kolombiano.

Durante vários aña, e chikitin nan aki mester a wanta e tipo di violensia aki di parti di nan propio mama. Pero e kos mas kruel di henter e historia, ta e momentu Heidy Milena Gomez Guzman a keda kondená pa e delitunan, na sinku aña i ocho luna di prizòn.

Un husgado di Tolima, na sentro ost di e pais, a komprobá ku e muhé, kende tabata traha den gobernashon di e departamento den e área di Apoyo, a torturá su dos yu muhénan di 9 i 12 aña di edat i tabata someté esaki nan na agreshon i maltrato konstante.

Esun ku a denunsiá e echo aki na outoridatnan kolombiano tabata e mama di e agresor, kende ya no a soportá mas di mira sufrimentu di su nietanan mas. E muchanan, por ehèmpel, no tabata risibí kuminda durante vários dia komo un forma di kastigu.

Segun a keda publiká pa medionan di komunikashon di e pais, den un entrevista ku e yu muhé grandi di e muhé, esaki a afirmá ku kasi henter su bida el a keda maltratá pero for di su 8 aña di edat, e agreshonnan a oumentá pa motibu ku e mama a kuminsá dal e i su ruman chikí ku kabel, palu, heru, moketa i kualke otro kos ku tin den su kaminda.

Esaki tabata asfiksiá su yunan ku kusinchi òf kabel na altura di nan garganta i tabata laga esaki nan keda durante vários dia sin kome. Ademas e tabata pone nan kana distansianan largu pa bai skol.

Na un okashon, e ruman grandi no a alkansá di drecha su mama i e muhé a dal e basta wanta, kore kuné for di kas despues di inkluso a dal e ku un martin na su pia i tambe su lomba.

E ruman muhé grandi, kende aktualmente tin 15 aña di edat, ta sufri di un malformashon di nasementu na altura di su hep, pa kua el a keda operá. Segun fiskalnan den e kaso aki, Gomez Guzman no a respetá e periodo di rekuperashon i a obligá esaki kushiná, hasi trabounan doméstiko i tambe tin bon resultado na skol. Na momentu ku e mucha no kumpli ku tur esaki nan, e tabata keda agredí.

Segun a keda relatá den tratamentu di e kaso aki, e mama semper a deskriminá e yu muhé aki pa su kondishon físiko i tabata reklamá esaki e gastunan di su tratamentu, pa kua inkluso el a menasá di kuminsá prostituí pa asina rekuperá su invershon ekonómiko.

Ademas, na momentu ku e òrdu di kaptura kontra e muhé a keda emití, di 13 di aprel di aña pasá, a komprobá ku esaki a akudí na un notario públiko pa asina kambia su nòmber pa Lua Mailen Santodomingo i modifiká su number di dokumentonan, pa asina evitá di keda detené.

E Instituto Kolombiano di Bienestar Familiar lo ta esun ku lo establesé unda i ku ken e muchanan lo keda i kon lo protehá esaki nan di awor aki pa dilanti.

E tata di e menornan di edat tambe ta bou di kuido di e Instituto Kolombiano di Bienestar Familiar. E hòmber a konfesá ku su pareha a yega di agredié na algun okashon i a ataká esaki ku un arma blanku.

E muhé, kende a keda mandá pa un prizòn di Ibagué, a pèrdè e kustodia di ámbos yu muhé definitivamente.