Barça a ganá den Camp Nou i ta den kuart final di Copa Rey

85
Fot lionel: Lionel Messi (L) aki ta toka leu for dje alkanse di e kiper Aitor Fernández pa skor e 3-0 pa Barcelona.

BARCELONA,  –  Futbòl Club Barcelona a klasifiká pa kuart final  di Copa Rey despues di bini di atras ku outoridat den seri kontra di Levante pa asina  ganá 3-0.

E ekipo a demostrá riba kancha ku nan tabata mester di pasá pa e siguiente rònt, aunke mester mira kiko ta bai sali for dje problema ku mester bai tuma lugá den kantor dje Federashon di Futbòl Spañó.

E ekipo di Levante a entrega un protesta akusando ku Barcelona alinia e hungadó hubenil Chumi den e partido  ida. Segun Levante Chumi tabatin akumulashon di karchi den ekipo U-23 di Barca.

Pero futbolístikamente no tabatin duda loke tabata pasando riba tereno, ya ku Barca tabata mucha mas mihó ku su rival durante hinter e partido.

Ernesto Valverde a plantia e partido ku Arthur  komo organisadó dje orkesta, porsierto na unda e la hasi magnífiko trabao.

E   hafnan tabata hunga habri pa trata di laga Coutinho, Dembélé i Messi  drenta via di mei mei di tereno. Un propuesta ku a ofresé solushonnan di tur tipo kontra  di un Levante ku di nan banda a hunga ku tres sentral i tabata dispuesto pa defendé ku uña i djente na bentaha chikí ku nan tabatin den partido di ida.

Mester rekòrdá ku Levante na kas a ganá Barca siman pasá 2-1.  E golnan pa duna Barcelona ayera a keda anotá pa Dembélé (2) i Messi.

 

Kosnan Importante dje Partido:

FC Barcelona: Cillessen, Semedo, Murillo, Lenglet, Jordi Alba (Sergi Roberto, 73′), Rakitic, Arthur, Arturo Vidal, Dembélé (Denis Suárez, 76′), Messi i Coutinho (Luis Suárez, 62′)

Levante UD: Aitor Fernández, Coke, Cabaco, Postigo (Jason 60′), Rober Pier, Moses, Campaña (Doukoure, 67′), Prcic, Bardhi, Boateng y Borja Mayoral (Dwamena, 60′)

Golnan: 1-0, Dembélé (30′); 2-0, Dembélé (31′); 3-0, Messi (53′)

Rèfri: Sánchez Martínez (murciano).  E la duna karchi hel na  Rakitic (43′), Murillo (44′) / Postigo (32′), Cabaco (74′) , Prcic (84′), Rober Pier (91′)

Insidensianan: Partido ku a tuma lugá den Camp Nou dilanti di  42.838 fanátiko.