Bradley Stuart: Nos ta trahando riba picheo hóben

107
Ronald Bloem ta e piesa di mas klave ku Firebirds lo bai sinti su falta den 2019. E picher a firma ku Santa Maria den desèmber.
Willemstad,– Firebirds tabatin un temporada mihó ku añanan anterior pa loke ta e nivel di “AA” i esaki lo ta un reto pa 2019, kaminda e ekipo lo bai trata sigur pa mehorá su posishon.

E ekipo a terminá nèt na di seis lugá pa klasifiká den e seis timnan ku a pasa pa e siguiente buèlta, kaminda den un wega nan ta kai vensí kontra di Groot Kwartier Stars despues di a hiba un lucha tenas i ta pèrdè pa falta di picheo.

E GM di e ekipo kende ta Bradley Stuart a splika Vigilante ku su ekipo lo traha duru den e off season aki pa firma algun hungadó ku sigur lo drecha nan ofensiva. El a splika ku nan a pèrdè Woods, pero a haña Pereira for di Wild Cats, miéntras ku tambe nan a pèrdè nan as picher Ronald Bloem kende a firma ku e Piratanan di Santa Maria.

Bèbè a splika nos ku e ta trahando riba algun hungadó, pero e ta preferá di no menshoná nòmber, paso tin kaiman na boka di riu.

Pa loke ta su picheo, e GM a splika nos ku riba merkado lokal no tin masha kos mas i pues e ta bai traha ku su farm system kaminda nan tin algun hóben ku sigur lo por tin un bon desempeño na nivel den “AA”.

“Nos ta traha ku nos brasanan hóben i sigur nos lo yega leu”, asina e hóben Stuart kende ta bai pa su di dos aña komo GM di Firebirds a splika.