Tur ekipo di “AA” por trese un picher komo refuerso

101
Presidente di Kwartier George de Lira sin duda ta un eksperto den buskamentu di refuersonan ku semper a duna resultado aki na Kòrsou. De Lira a yega di bini ku dos kubano ku a hiba e ekipo di Kwartier na nan úniko playoff final den nan historia, ken no ta kòrda Manuel Benavides.
Willemstad,– Federashon di Beisbòl di Kòrsou (FEBEKO) a tene su promé reunion di aña kaminda a trata algun proposishon ku e ekiponan a bini kuné den e reunion di desèmber aña pasa.

Mester bisa ku a papia riba diferente tópiko i diferente proposishon, pero e úniko ku a yega na votashon ta e asuntu di refuerso pa ekiponan di “AA”.

Tabatin riba mesa un proposishon kaminda ekiponan a pidi pa bini ku refuerso pero ku eksepshon di e ekipo ku bira kampion i sup kampion de e aña koriente, pues den e kaso aki e ekipo di Santa Maria i Wild Cats respektivamente.

For di aña pasa a bini dilanti ku e regla aki ta unu diskriminatorio, paso tur ekipo mester tin e mesun derecho. No ta un sekreto pues ku e ekiponan ku a trese e proposishon aki kier a trata di ekskluí Santa Maria i Wild Cats for di e asuntu di bini ku refuerso i sigur pa un tempu largu si mira ku tur probalidat e dos ekiponan aki lo bai keda hunga algun final pa algun aña tras di otro, lokual ku ya tin sigur sinku aña kaba ta tumando lugá.

Finalmente durante e último reunion, e ekiponan a bai di akuerdo ku kada ekipo tin derecho di buska 1 PICHER pa temporada i si manda e picher bӐk pa su pais pa un òf otro motibu por bini ku un otro, pero semper i kuando e picher kumpli ku su 12 weganan pa e por partisipá den playoff. E ekiponan ku sigur ya a anunsiá ku nan lo bini ku refuerso ta Santa Maria, Kwartier, Wild Cats i Scorpions, miéntras ku mester wak kiko Santa Rosa, Firebirds i Marchena lo bai hasi.