Hóben ta pèrdè su bida despues di kai for di krusero na Haiti

73
E hóben aparentemente a kai for di 8 piso di altura.

PORT-AU-PRINCE – Un hóben di 16 aña di edat a pèrdè su bida despues di a kai den bashí for di un krusero di e empresa di Royal Caribbean ku tabata ankrá na e puerto di Labadee, Haiti. Esaki segun loke a keda anunsiá pa e kompania mes i tambe pa outoridatnan ku a atendé e suseso.

Despues di aparentemente pèrdè su yabi, Laurent Mercer, un franses ku ta bini di e islanan oseániko Wallis i Futuna, a intentá di drenta den su kamber, via di balkon di su bisiña. Pero lamentablemente esaki a perde ekilibrio i a bai for di ocho piso di e barku Hamony of the Seas.

E ekipo médiko di e embarkashon mesora a presentá i a intentá di realisá un reanimashon kardiopulmonar, pero e hóben a sufri un troumatismo na altura di su kráneo di basta importansia kua a pone ku el a keda deklará morto na e sitio mes. Esaki segun informashonnan duná den un komunikado di e ofisina forense di e kondado di Broward.

E forense nan estadounidense a risibí kurpa sin bida di e hóben aki, despues di dos dia, na regreso di e krusero na e teritorio norteamerikano i a deskartá un akshon kriminal despues di esaki su fayesementu.